MADRID, 18 d'Avientu (EUROPA PRESS)
El ministru del Interior, Jorge Fernández Díaz, negó esti xueves que dende esti departamentu o dende'l Gobiernu se presionra a xueces del Tribunal Supremu sobre la manera en qu'han computase les penes de los terroristes y sorrayó que "respeta y va respetar siempre" la separación de poderes como pegoyu fundamental d'un Estáu democráticu como ye España.
El titular d'Interior respondió asina a los 13 maxistraos de la Sala Penal del Supremu que se dirixeron per carta al presidente d'esti órganu y del Conseyu Xeneral del Poder Xudicial(CXPX), Carlos Lemes, pa qu'actúe ante'l presidente del Gobiernu polo que consideren metedures del ministru del Interior al calificar de "llamentables" y posible prevaricación les recientes escarcelaciones de miembros d'ETA.
Mientres la xura de 24 nuevos comisarios principales que, pertenecientes a la XXIV Promoción, van incorporase a los sos nuevos destinos nos próximos díes, celebrada nel madrilanu barriu de Carabanchel, Fernández Díaz calcó en qu'él respetó y va respetar siempre la llei, del mesmu mou que "respeta y va respetar siempre" la separación de poderes amparada pola Constitución.
Nesti sen, recordó que'l Boletín Oficial del Estáu publicó'l pasáu 13 de payares una llei orgánica qu'incorpora la norma comuntaria a derechu español según la que se torga n'España l'acumulación del tiempu de prisión cumplíu por condenes impuestes n'otros países de la UE antes del 15 d'agostu del 2010.
De la mesma manera, calcó en que la Constitución recueye la separación de poderes como garante d'un Estáu democráticu. Una separación de poderes, repostió, "que ye'l fundamentu d'un bon funcionamientu d'un Estáu democráticu, social y de derechu, d'un Estáu como ye'l nuesu Estáu".
Preguntáu polos periodistes, qu'insistíen na so valoración del pidimientu de los maxistraos a Carles Lesmes pa que tresllade al presidente del Gobiernu esta quexa, el ministru abondó na mesma idea. "Yá fui bien claru colo que dixe", repitió.
Tocantes a la dimisión del fiscal xeneral del Estáu, Eduardo Torres Dulce, el ministru d'Interior fizo suyes les palabres de Mariano Rajoy, que negó discrepancies col Gobiernu y calcó en qu'esta dimisión "respuende namás a razones personales".
"Nun voi contradicir yo al interesáu, que dixo que ye por razones personales", sorrayó Fernández Díaz. "Evidentemente tengo que creeme y creo al fiscal xeneral del Estáu", repostió.
