UVIÉU, 12 de Setiembre (EUROPA PRESS)
Iniciativa pol Asturianu criticó esti miércoles nuna nota prensa la posibilidá abierta de pesllar el Serviciu de Normalización Llingüística del Cabu Peñes. Asina, opónse a esti estremu, y refuga la escusa del aforru económica, pues, según recuerda, el serviciu ta sovencionáu íntegramente pola Conseyería de Cultura.
Recuerda na nota que'l SNL da serviciu a ciudadanos y entidaes de los conceyos de Carreño y Gozón dende va años y "agora quier pesllase cola escusa del aforru económicu de la Mancomunidá del Cabu Peñes". "Dende Iniciativa pol Asturianu recordamos a les formaciones d'estos
conceyos que'l Serviciu fináncialu'l Gobiernu d'Asturies al traviés d'unes sovenciones añales y que nun pue usase la escusa del aforru como motivu del pieslle d'esti SNL", añadió.
Amás, según Iniciativa, "los servicios ofrecíos por esti Serviciu suponen un valor añadíu pa los conceyos mancomunaos, pues l'usu del asturianu xenera un valir estra a productos y servicios d'empreses y otres entidaes, amás d'apoyar el caltenimientu del idioma, un bien cultural y económicu, pa les futures xeneraciones".
La organización quier amás pidir a la Mancomunidá del Cabu Peñes que "refuercen esti SNL y busquen una solución estable col Gobiernu d'Asturies, al traviés d'un conveniu que dea estabilidá al organismu, y nel que los conceyos de la Mancomunidá se comprometan daveres col procesu de normalización llingüística nos sos territorios".
