XERUSALÉN, 19 de Payares (EUROPA PRESS)
El Gobiernu d'Israel criticó'l llamáu del Congresu de los Diputaos españoles pa reconocer a Palestina como Estáu y alvirtió de qu'esti tipu d'iniciatives namá afalen "posiciones estremes" y "alloñen" la posibilidá de la paz n'Oriente Próximu.
Tolos grupos parlamentarios españoles algamaron el martes un acuerdu pa encamentar al Gobiernu de Mariano Rajoy reconocer l'Estáu palestín, pero vinculando esti movimientu a que se produza antes "un procesu de negociación" ente israelines y palestinos.
Pal Ministeriu d'Esteriores israelín, esta declaración "namás alloña les posibilidaes d'algamar un acuerdu ente Israel y los palestinos", dao que "anima" a estos últimos a "adoptar posiciones estremes", según un comunicáu.
"Sería meyor que'l Parlamentu español denunciara l'abominable masacre nuna sinagoga de Xerusalén, cometida por palestinos afalaos", añadió'l Ministeriu israelín, n'alusión al ataque del martes nel que morrieron cuatro rabinos y un policía.
Frente al malestar israelín, la misión diplomática de Palestina en Madrid agradeció'l martes de nueche "el xestu solidariu" del Congresu, sorrayando que ye "una inversión na paz". Nesti sen, destacó qu'España "pue xugar un rol decisivu" dende'l Conseyu de Seguridá de Naciones Uníes.
