Los sos lletraos defenden que "nun cometió alzamientu de bienes nin contribuyó a que se cometiera"
UVIÉU, 29 Sep. (EUROPA PRESS) -
La defensa de Jesús Ortiz Álvarez, pá de la Reina Letizia manifestó esti llunes que'l so defendíu "nun tien nin tuvo nel pasáu relación dalguna con Henarmonía S.C., sociedá debedora de la cantidá que reclama la denunciante Sandra Ruiz y que dio orixe al procesu en cursu".
El despachu Garrido Abogaos defendió asina a Jesús Ortiz, nun comunicáu unviáu a Europa Press, en relación a l'apertura del xuiciu oral nel procedimientu abreviáu d'acusación por insolvencia punible escontra Jesús Ortiz Álvarez. Na causa tamién tán imputaos Henar Ortiz Álvarez y María del Carmen Álvarez del Valle, padre, tía y güela de la Reina Letizia.
Los lletraos de Jesús Ortiz puntualicen que'l so veceru "nun cometió alzamientu de bienes nin contribuyó a que se cometiere, yá que nun tenía conocencia, cuando aceptó l'heriedu de so pá, de les posibles deldes d'Henarmonía, S.L." y destaca que la Fiscalía nun apreció nicios de delitu.
Amiesten que'l tracamundiu que se ta xenerando "vien motiváu porque Jesús Ortiz foi parte, con un 10% del capital, n'Henar Ortiz Decoradora, S.L. Polo tanto esclarien qu'Henar Ortiz Decoradora, S.L. nun tien nenguna delda con Sandra Ruiz. Qu'Henar Ortiz Decoradora, S. L. nun ye nin foi nunca participe o parte de la S.C. Henarmonía. Y qu'Henar Ortiz Decoradora, S. L. sí contraxo una delda con Sandra Ruiz de 5.200,12 euros, que foi abonada por Jesús Ortiz en calidá de sociu d'esta sociedá, quien s'allanó a la demanda namás que tuvo conocencia d'ella.
"Ye falso, por tanto, qu'esista interés propiu nel alzamientu como se recoyó en dellos Medios, yá que Jesús Ortiz nun tien nenguna delda pendiente con Sandra Ruiz, nin a títulu personal nin al traviés de sociedá dalguna", sostienen los lletraos y amiesten que "l'apertura del xuiciu oral ye un actu procesal que nun amenorga nada la presunción d'inocencia del imputáu".
