UVIÉU, 23 de Xunetu (EUROPA PRESS)
El que fuera voceru parlamentariu del Partíu Popular na Xunta Xeneral, y adversariu d'Ovidio Sánchez na batalla pol lideralgu de la formación, Juan Morales, tornó al PP dempués de dase de baxa nel 2009.
Anunciólo esti miércoles en rueda prensa, acompañáu pola presidenta del PP asturianu, Mercedes Fernández, que considera que la so vuelta a "la que siempre foi la so casa" va valir d'incentivu pa qu'otros que colaron tamién tornen a esti partíu.
Morales, que dexó'l Partíu Popular enfrentáu al equipu directivu daquella, encabezáu por Ovidio Sánchez, afirmó que "munches coses" cambiaron nel PP asturianu. La primera, según esplicó, ye'l "mensaxe". Los continuos llamaos a la converxencia del centru derechu y a l'abertura del partíu que tuvo realizando la so presidenta "son convencimientos, y comprobélo en carne propio", destacó. "Veo un partíu abiertu y con ganes", comentó, n'esplicando que caltuvo una xunta col diputáu Luis Venta Cueli pa tratar el so posible regresu. Nesti alcuentru apreció "una voluntá real pa que nel centru derecha y la derecha haya una converxencia mirando al futuru, con unión tolerancia y xenerosidá".
Nun quisieron nin Morales nin Fernández falar de posibles cargos o responsabilidaes, a preguntes de los periodistes. Según el mesmu exvoceru parlamentariu, torna a la formación "como militante de base, a trabayar no que se me diga y como se me diga". "Toos tenemos el nuesu sitiu nel PP pero nun tenemos el mesmu", matizó la presidenta popular'.
Preguntáu por si s'arrepiente de dexar nel so día el partíu y entamar l'aventura política con Ideas, agrupación de formaciones independientes que malpenes llogró 6.500 votos nes elecciones autonómiques del 2011, esplicó que tomó aquella decisión "obligáu poles circunstancies pero que la mio casa yera'l PP". "Naquel momentu la situación yera "bien tensa", añadió, destacando que'l recibimientu que tuvo agora nel Partíu Popular d'Asturies foi "bien prestosu".
Mercedes Fernández señaló l'exemplu de Morales p'animar a incorporase al PP asturianu a toles persones que nun s'identifiquen cola izquierda.
