BRUXELES, 22 de Mayu (EUROPA PRESS)
El presidente de la Comisión Europea, Jean-Claude Juncker, caltuvo una "xunta constructiva" col primer ministru griegu, Alexis Tsipras, sobre la situación de la deuda griega y aldericaron el camín a siguir al cabu del conceyu de l'Asociación Oriental en Riga.
"Tuvieron una xunta constructiva d'unos 45 minutos. Repasaron los progresos y aldericaron el camín a siguir", esplicó a Europa Press la vocera del Executivu comunitariu, Mina Andreeva, que nun dio detalles del conteníu de les negociaciones.
Una fonte europea avanzó a Europa Press que s'espera que'l Grupu de Bruxeles siga los discutinios con Atenes mañana y "a primeros de la selmana qu'entra" na capital belga, anque de primeres namás taben previstes hasta'l sábadu.
"Muestra qu'hai voluntá d'acelerar el trabayu" con cuenta de tratar de llegar a un acuerdu, precisó la fonte.
Al respective de les negociaciones en marcha ente representantes de la Comisión Europea, el Bancu Central Européu y el Fondu Monetariu Internacional y del Gobiernu griegu qu'entamaron el pasáu miércoles en Bruxeles, la fonte reconoció que se produxeron "pequeñes" meyores anque "los griegos siempre son demasiao optimistes".
"Hai voluntá d'esplorar cómo desincentivar la xubilación antemanada, pero tovía tienen que presentar un documentu", esplicó la fonte, a manera d'exemplu.
La reforma llaboral, les pensiones y el salariu mínimu siguen siendo les principales torgues pa zarrar un acuerdu ente Grecia y los sos acreedores, a una selmana escasa del próximu vencimientu que debe al Fondu Monetariu Internacional, que permita lliberar los 7.200 millones d'euros pendientes del segundu rescate en cuenta de los compromisos nes reformes, en llinia coles esixencies del Eurogrupu.
