UVIÉU, 6 Jun. (EUROPA PRESS) -
El presidente de l'Academia de la Llingua Asturiana, Xosé Antón González Riaño, calificó como oportunidá l'anunciu de qu'Isabel Celáa va ser la ministra d'Educación nueva pol so "compromisu col plurillingüismu", polo qu'espera "enfotu y decisión" dende'l Gobiernu asturianu pa reclamar la creación de la especialidá docente.
En declaraciones a Europa Press, Riaño valoró esti "compromisu", que sía falante de vascu nun nivel "peraltu" y la so xestión como conseyera d'Educación nel País Vascu, onde Celáa fixo apueste pol trillingüismu vascu, castellanu y inglés.
Asina, el presidente de l'Academia faló d'una "oportunidá" pa que salgan alantre reivindicaciones históriques de la comunidá educativa asturiana, como l'aprobación de la especialidá docente pal profesoráu de llingua asturiana.
Trátase d'una midida que'l conseyeru de Cultura asturianu, Genaro Alonso, llevaba meses negociando col ministru d'Educación, Íñigo Méndez de Vigo, ensin que saliera alantre pola negativa de Madrid a crear la especialidá pa una llingua que nun ye oficial.
Dende'l Gobiernu asturianu siempre afirmaron que la falta d'oficialidá nun ye xustificación abondo, porque llingües como'l griegu, el llatín o'l francés, que nun son oficiales dientro del Estáu español, cuenten con especialidá propia.
Nesi sentíu, el presidente de l'Academia indicó qu'agora existe la posibilidá de que salga alantre al dirixir el ministeriu d'Educación "una persona sensible, falante d'una llingua minoritaria y del mesmu partíu políticu que gobierna n'Asturies". "Tamos nuna situación que históricamente nun tuviemos enantes", afirma.
Asina, espera qu'acaben los "planteamientos ideolóxicos" que dende Madrid, col gobiernu de Mariano Rajoy, impidieron la especialidá. "El Gobiernu asturianu actual fixo les xestiones afayadices col Gobiernu del PP y tien que continuar al tener en cuenta la oportunidá que s'abre", afirmó Riaño, de la que pidió al Executivu autonómicu "enfotu y decisión".
LA ESPECIALIDÁ DOCENTE
La creación de la especialidá docente ye una midida que los principales sindicatos educativos asturianos --CCOO, UXT, Suatea y CSI-- vienen reclamando, al afirmar que la falta d'oficialidá supón que nun existe la especialidá docente pa los más de 400 profesores qu'imparten asturianu, polo que nun puen presentase a oposiciones, tener una plaza fixa o optar a un concursu de tresllaos.
Nel ámbitu políticu, tolos partíos asturianos apoyen esta midida o, polo menos, lleváronlo en dalgún momentu nel so programa. Mesmamente, nel 2009, el PP foi'l que presentó na Xunta Xeneral una proposición non de llei pa la creación de la especialidá docente d'asturianu.
La Xunta Xeneral aprobó nos últimos años delles resoluciones pa que dende Madrid pongan en marcha esta midida, anque'l PP suel votar en contra. Nel 2014, l'apoyu a la creación de la especialidá sumó a PSOE, IX, Foru y UPyD, daquella con un diputáu nel Parllamentu asturianu, Ignacio Prendes, güei portavoz de Ciudadanos n'Asturies y diputáu en Madrid.
Al marxe de les negociaciones nueves qu'entamen dende'l Principáu col Gobiernu de Pedro Sánchez, espérase que la especialidá d'asturianu llegue al Congresu nos meses próximos. Y ye qu'Unidos Podemos presentó en mayu nel Congresu una Proposición Non de Llei (PNL) pal reconocimientu y creación de la especialidá docente pal profesoráu de llingua asturiana.
