UVIÉU, 16 de Setiembre (EUROPA PRESS)
La presidenta de l'Academia de la Llingua Asturiana, Ana Cano, reclamó esti vienres a la nueva conseyera d'Educación, Ana Isabel Álvarez, que dea pasos dende l'executivu autonómicu pa la "reconocencia de la especialidá de llingua asturiana al profesoráu qu'imparte esta materia nes distintes árees de la enseñanza non universitaria".
Mientres la clausura de la Universidá de Branu (Uabra) de l'Academia de la Llingua, y l'actu d'entrega de diplomes a los cerca de 150 participantes nos cursos de Cangas, Cano refirióse a esti asuntu. Nel actu tuvo presente la conseyera, el rector de la Universidá d'Uviéu, Vicente Gotor, y l'alcalde de Cangas, José Luis Fontaniella.
Nel so discursu, Cano considera qu'agora-y toca a la "conseyera", de quien destacó la so "sensibilidá escontra esta cuestión", "tomar les midíes afayadices pa qu'esti problema se resuelva pronto". Si nun se fai asina, la presidenta de l'Academia entiende que "se ta capacitando pa exercer un oficiu reguláu por llei, que s'exerza esi oficiu y, d'otra manera, a los profesionales que lu tán exerciendo nun se-yos reconoz".
Dende'l so puntu de vista, "ye una sinsentíu". Asina, comparó la situación cola del aranés, "pa una población de 10.000 habitantes, a los que correspuende un 22% de llingua materna aranesa, y 1.200 alumnos escolarizaos n'infantil, primaria y secundaria". "Asturies, tien más d'un millón d'habitantes y más de 130.000 alumnos na educación non universitaria", matizó la presidente de la institución.
La conseyera nun se refirió a esti asuntu na so intervención. Destacó, sicasí, "l'ésitu de la UBRA", y mostró l'interés del so gobiernu en siguir dando "pasos cortos pero seguros" en favor de la defensa de la llingua asturiana. Asina, mentó los casi 18.000 alumnos de primaria y casi 4.000 de secundaria que na presente temporada llectiva van cursar "llingua" asturiana.
El rector, pela so parte, enumberó delles meyores universitaries en favor de la 'llingua' asturiana, como la creación de la Comisión de Normalización Llingüística Universitaria, o l'almisión de tesis doctorales n'asturianu, aspectos que formen parte, según el so discursu, del so "firme compromisu" cola defensa de la llingua asturiana.
L'alcalde, pela so parte, empezó'l so intervención en 'fala' lleyendo unos versos de Berta Piñán, y apoyó "el trabayu dacuando inciertu en favor de la sobrevivencia de la nuesa llingua".
Antes de les intervenciones, toes n'asturianu, los alumnos participantes fueron recoyendo los sos diplomes acreditativos, nos ocho cursos ofrecíos esti añu: elemental, 'avanzáu', capacitación pa la traducción, aplicaciones d'internet, 'Xuegos y tradiciones populares', historia d'Asturies, 'Aniciu a la investigación toponímica' y cursu de gallego-asturianu.
