UVIÉU, 2 Oct. (EUROPA PRESS) -
L'Academia de la Llingua Asturiana úfrese pa collaborar pa que'l "determín de los socialistes asturianos" encaxe coles espectatives ciudadanes "que demanden un "billingüismu social equilibráu" y pa tener "pontes d'entendimientu ente les diferentes fuercies polítiques".
Al traviés d'una nota de prensa, l'Academia mostró'l so posicionamientu sobre la decisión de la FSA-PSOE d'amestar a les sos llinies programátiques la demanda de la oficialidá de l'asturianu dientro de los alcuerdos del so XXXII Congresu, celebráu n'Uviéu ente'l 29 de setiembre y el 1 d'ochobre. Una decisión pola que l'Academia felicitase y felicita "a tolos asturianos y asturianes".
Pa la institución, la llingua y la cultura d'Asturies vienen teniendo a lo llargo de les últimes décades un desenvolvimientu innegable dende'l puntu de vista de la so codificación y normativización, "al empar, les actitúes sociales y les demandes alredor de la normalización algamen posiciones mayoritaries ente la ciudadanía d'Asturies".
Sicasí, señalen, estos avances nun se vieron acompañaos de les midíes xurídiques que contempla la Constitución Española pa les respectives llingües autonómiques y que pasaron "en tolos casos, menos nel asturianu" pel reconocimientu del estatus llegal d'oficialidá. Coles mesmes, afirmen que la Llei d'Usu mostró les sos "insuficiencies" a la hora de facer vidable la sobrevivencia del idioma asturianu.
"Nin se xeneralizó la enseñanza en toles estayes educatives, nin se garanticen los derechos profesionales del profesoráu -especialidá docente-, nin hai medios de comunicación públicos dafechu n'asturianu, nin hai promoción efectiva del so usu n'espacios formales de comunicación", recuerden.
L'Academia afirma que, por too eso, el futuru del idioma pasa pela oficialidá, "esixencia permanente d'una parte mui importante de la sociedá y de les instituciones asturianes práuticamente dende la transición política". Amás, recuerden que siempre demandaron a les instancies polítiques la busca d'un consensu políticu sobre la oficialidá, "a veces énte la indiferencia y incomprensión de los partíos mayoritarios n'Asturies".
Por eso, opinen que la decisión algamada nel Congresu de la FSA-PSOE, "qu'emocionó a munchos de los delegaos", llega años depués de qu'otros partíos asturianos parllamentarios la amestaren al so ideariu políticu, "pero nun podemos por ello resta-y importancia".
"Con esta decisión, la FSA-PSOE, el partíu mayoritariu n'Asturies dende'l restablecimientu de la democracia, fai posible enanchar el consensu políticu pa facer vidable una reforma del Estatutu que lleve a la tan naguada oficialidá", sentencien
"Ye una decisión que merez la reconocencia y el respetu de l'Academia y que foi posible porque asina lo quixeron los militantes socialistes, pero tamién pola mor de l'anovación xeneracional y estratéxica d'unos dirixentes que, como Adrián Barbón, quieren abrir calces nuevos na so rellación cola llingua y la cultura d'Asturies", afirma l'Academia.
Asina, la institución diz que-yos toca collaborar " pa que'l determín de los socialistes asturianos encaxe coles espectatives ciudadanes que demanden un billingüismu social equilibráu ente asturianu y castellanu na nuestra comunidá y tamién pa tender pontes d'entendimientu ente les diferentes fuercies polítiques"." Ye, cenciellamente, afitar un idioma milenariu, el nuestru", sentencien p'acabar.
