UVIÉU, 26 Abr. (EUROPA PRESS) -
El Muséu Arqueolóxicu d'Asturies acueye esti vienres 27 d'abril a les 19.00 hores una mesa redonda titulada 'L'asturianu: la llingua d'un Reinu'. La mesma ta entamada pola Academia de la Llingua Asturiana y forma parte de la programación de Cuadonga Centenarios 2018.
La mesa va tar moderada pola filóloga y expresidenta de l'Academia Ana Cano y van intervenir los profesores de la Universidá d'Uviéu Miguel Calleja Puerta, Francisco Javier Fernández Conde, Margarita Fernández Mier Y Xosé Lluis García Arias.
Va ser a les 19.00 hores nel Salón d'Actos del Muséu y cuenta col apoyu del Gobiernu d'Asturies, la Universidá d'Uviéu, el mesmu Arqueolóxicu y Cuadonga Centenarios 2018.
Trátase del primer actu n'asturianu dientro de la programación del tripe centenariu d'Asturies; centenariu de la coronación de la Virxe de Cuadonga, los 1.300 años de los orixes del Reinu d'Asturies y la creación, hai un sieglu, del Parque Nacional de la Montaña de Cuadonga.
Ente los actos que tienen la llingua asturiana como vehícular ta esta xornada sobre'l nacimientu de la llingua qu'entama l'Academia, a la que va siguir otra sobre los primeros testos nesti idioma.
Per otru llau, la Conseyería d'Educación y Cultura va facer una mesa redonda sobre l'orixe de l'asturianu y, amás, va reeditase un llibru de poesía del concursu sobre Cuadonga que se fixo nos años sesenta nel Teatru Campoamor.
