UVIÉU, 19 Sep. (EUROPA PRESS) -
Les Mocedaes Socialistes d'Asturies (JSA/MSA) y l'Agrupación Socialista d'Uviéu van llevar una enmienda al Congresu de la FSA-PSOE pa que'l partíu asuma la oficialidá del asturianu. Nos díes próximos, espérase que la enmienda cuente col apoyu de más de 20 agrupaciones.
L'agrupación de Uviéu aprobólo esti llunes ensin nengún votu en contra y con una abstención, mentes que les Mocedaes Socialistes informaron al traviés de twitter de l'aprobación y que "siguen" faciendo apueste pola oficialidá.
La enmienda, que se va debatir nel XXII Congresu Autonómicu del partíu, que se va celebrar ente'l 29 de setiembre y el 1 d'ochobre, busca sustituir l'artículu 367 de la ponencia marcu. Asina, quier que'l PSOE asturianu defienda la oficialidá de la llingua nel momentu nel que se produza una reforma del Estatutu d'Autonomía.
La enmienda, afalada por un grupu de militantes axuntaos baxo'l nome de 'Socialistes pola Oficialidá', va debatise en más de venti agrupaciones pa llegar al Congresu col máximu apoyu posible.
Ente elles, amás d'Uviéu, tán Xixón, Samartín del Rei Aurelio, L.lena, Llanera, Villaviciosa, Parres, Ayer, Colunga, Candamu, Sariegu, Corvera, Mieres, Nava, Llangréu, Sobrescobiu, Grau, Morcín, Llaviana, Siero y Casu, anque pue haber más onde se presentó ensin que dende 'Socialistes pola Oficialidá' tenga conocimientu.
