UVIÉU, 06 de Xunu (EUROPA PRESS)
Les patronales mayoritaries del tresporte de mercancíes per carretera de la rexón, Asetra y Cesintra, firmaron güei un preacuerdu colos cargadores, en rellación al conflictu surdíu de magar l'incrementu del preciu del combustible. El mesmo tomóse tres presenta-yos per escrito la so propuesta sobre les condiciones que tienen de rexir los futuros y presentes contratos de tresporte, que va tener de ser confirmáu por tolos órganos representativos, tanto de les empreses cargadores como de los sindicatos. Nun foi aceptáu, sicasí, por UITA, integrada por autónomos. Pela so parte, los pescadores d'Avilés sumáronse a la fuelga nel so sector pol mesmu motivu.
El presidente de l'Asociación d'Empresarios del Tresporte y Aparcamientu d'Asturies (Asetra), Ovidio de la Roza, manifestó a la salida del conceyu calteníu na sede de la Conseyería d'Infraestructures, qu'UITA nun pudo firmar el preacuerdu porque pa ello tenía que desconvocar la fuelga.
De la Roza, qu'afirmó que'l conceyu calteníu güei foi "mui positivu" dixo que-yos "preocupa'l clima d'alarma y intranquilidá qu'UITA ta creando n'Asturies, pero nun-yos preocupa muncho que nun firme l'acuerdu".
"Güei quedó demostrao que n'Asturies hai total normalidá nel tresporte porque'l poder de convocatoria tiénenlu les organizaciones mayoritaries", dixo De la Roza.
Pela so parte, el presidente de la Unión Independiente de Tresportistes Autónomos (UITA), José Fernández, indicó que "l'aconceyamientu al so xuiciu nun sirvió pa nada" y añadió que tanto Asetra como Cesintra "trataron de cola-yos un acuerdu pa tratar de forzar a desconvocar el paru que nós tampoco tenemos capacidá de desconvocar". Un paru qu'al so xuiciu "ta siendo siguíu por un 60% de los tresportistes asturianos".
"Nun firmamos nengún engañu que mos quieran colar porque nun somos fatos y tenemos dignidá", dixo Fernández, qu'insistió en que'l paru y les protestes van siguir hasta que la mnistra se siente a negociar y les reivindicaciones de los tresportistes s'espeyen nel BOE.
Asina indicó qu'Asetra y Cesintra traxeron al conceyu de güei les propuestes d'UITA, "apropiándose d'elles, mientres qu'en Madrid ta defendiendo otres".
El responsable d'UITA insistió en que'l paru va siguir p'alantre de manera indefinida y añadió que lo que digan Ovidio de la Roza y Enrique Riaño sobre un acuerdu o la desconvocatoria del paru "da-yos igual". Amás, añadió que los aconceyamientos tán "mutilaos" porque a los mesmos nun se cita a toles empreses y cargadores.
PESCADORES D'AVILÉS EN PARU.
Pela so parte, la flota pesquera d'Avilés sumóse dende güei al conflictu pol alza del petroleu. La práutica totalidá de los barcos con base na Cofradía Virxe de les Marees tán ya amarraos y espérase que nes próximes hores se sumen les cuatro embarcaciones de baxura, según informó'l patrón mayor d'avilés, Gregorio López, en declaraciones a Europa Press.
El presidente de la cofradía avilesina aseguró que "la flota ta parada dafechu". Pela so parte, Alfredo Gutiérrez, representante de la plataforma que promueve'l paru, esplicó que nel día de güei nun s'esperen piquetes ya que ta previsto que'l conflictu se radicalice de magar la próxima selmana.
"Güei toi en Burela pero sé que'l paru ta siendo cada vez mayor" espunxo Gutiérrez, en declaraciones a Europa Press. Ayeri, un grupu d'armadores gallegos enfrentóse a pescadores asturianos na rula d'Avilés y entamaron una campaña informativa por pescaderíes y grandes superficies pa tratar de frenar la entrada de pescáu d'esportación.
Pela so parte, la Federación Asturiana de Cofradíes, contraria de primeres al paru, va caletner a les 19.00 hores de güei un conceyu pa estudiar la posición que va adoptar de cara al próximu alcuentru previstu pal llunes en Madrid.
