WASHINGTON, 20 de Xunetu (Reuters/EP)
El gobernador del estáu d'Illinois, Pat Quinn, promulgó esti domingu una llexislación qu'autoriza l'usu de marihuana melecinal pa neños y adultos que sufran epilepsia coles mires d'alliviar los sos síntomes, parte d'una serie de midíes que moderen les restricciones sobre'l cannabis nel país.
La iniciativa d'amestar la epilepsia y otros trestornos de convulsiones a la llista de condiciones llegales pa tratar con marihuana o los sos estractos llega nun momentu en que numberosos estaos tornaron en llegal l'usu médicu de la droga. Amás, los estaos de Coloráu y Washington llegalizaron el so usu recreativu.
"Esta nueva llei va ayudar a solliviar el sufrimientu de munchos adultos y neños nel estáu", dixo Quinn nun comunicáu. "La epilepsia ye una condición debilitante y esti mui necesariu aliviu va ayudar a amenorgar parte de los sos síntomes p'aquéllos que soporten convulsiones", amestó.
La llei d'Illinois, qu'entra en vixencia en xineru del 2015, va dexar que los neños qu'a sufren convulsiones los traten con formes de cannabis que nun se fumen, siempre que tengan permisu de los padres.
