NUEVA YORK, 21 d'Agostu (EUROPA PRESS)
L'Estáu Islámicu pidió de primeres un rescate de 100 millones d'euros en cuenta de la lliberación del periodista estaounidense James Foley antes d'alvertir la selmana pasada nun corréu electrónicu a la so familia de que lu executaría, amenaza que fizo efectiva esti martes.
Asina lo reveló en declaraciones a los medios estaounidenses Philip Balboni, presidente executivu de 'GlobalPost', el mediu electrónicu pal que trabayaba Foley en Siria cuando lu secuestraron en payares del 2012.
Según indicó, los captores de Foley pidieron a la familia del periodista y al 'GlobalPost' un rescate de 100 millones d'euros. El mensaxe treslladáronlu a les autoridaes pertinentes.
Sicasí, la respuesta del Gobiernu estaounidense, como vien siendo la so política nesti tipu de casos foi negativa, destaca'l 'New York Times', que tamién informó del pidimientu d'un "rescate multimillonariu" por Foley, citando a un representante de la so familia y a un antiguu rehén que tuvo reteníu xunto con él en Siria.
El pidimientu de rescate llegó en payares del 2013, acompañada por una prueba de vida, y a partir d'entós hubo "bien pocos mensaxes de los captores que, según Balboni, "nun yeren bien falanderos", namás formulaben les sos "demandes".
A lo último, y tres un silenciu, el pasáu miércoles la familia recibió un nuevu mensaxe. "El mensaxe yera corroyente y taba cargáu de rabia contra Estaos Uníos. Yera terriblemente seriu", esplicó Balboni, precisando que nél amenazábase con executar a Foley.
"Obviamente, confiamos y rezamos pa qu'eso nun asocediera (...) desgraciadamente nun mostraron nenguna piedá", llamentó, asegurando que nel so últimu mensaxe, qu'igualmente se fizo llegar al Gobiernu, "nun había nenguna demanda".
