BRUXELES, 30 de Xunu (EUROPA PRESS)
Los ministros d'Economía de la eurozona acabaron la so teleconferencia sin llograr un acuerdu d'últimu minutu sobre Grecia, magar que'l primer ministru helenu, Alexis Tsipras, pidiera una prórroga pa evitar l'impagu cuando acaba'l programa actual esta medianueche, y tener asina tiempu pa negociar un tercer rescate de 29.100 millones d'euros.
L'Eurogrupu va tener una segunda xunta telefónica mañana miércoles pa "evaluar" al nueva propuesta griega, informaron a Europa Press fontes europees.
Nuna carta al Eurogrupu y a los miembros del Mecanismu Européu d'Estabilidá (MEDE), Tsipras plantega negociar un tercer rescate de dos años pa facer frente "namás" a los vencimientos de deuda esterna ya interna, pero nun ofrez condiciones a cambiu. Mientres, plantega una "corta prórroga" del actual rescate --qu'acaba esta medianueche -- pa evitar "un impagu técnicu".
Esta medianueche, amás del programa actual de rescate, tamién acaba'l plazu pa que'l Gobiernu griegu faiga frente al pagu de 1.500 millones d'euros al FMI.
"Ye llamentable pa Grecia que'l programa (de rescate) acabe sin nengún acuerdu que-y dea siguimientu y que se pongan en riesgu los resultaos positivos del programa", dixo pela so parte el director del fondu de rescate (MEDE), Klaus Regling, nun comunicáu.
