"L'exemplu de la oficialidá del gallegu, diseñada pol PP, ye una referencia p'Asturies", diz Nicolás Bartolomé

Contador
Alberto Núñez Feijóo saluda a Manuel Fraga
PPDEG/EUROPA PRESS
Publicado 07/12/2017 11:14:26CET

UVIÉU, 7 Dic. (EUROPA PRESS) -

El xurista Nicolás Bartolomé afirmó que'l desarrollu de la oficialidá del gallegu ye una referencia "interesante" p'Asturies, porque muestra qu'esti marcu llegal pue desenvolvese "ensin necesidá de que los castellanofalantes vean atacaos los sos derechos". Bartolomé recordó que foi'l PP l'encargáu de diseñar la oficialidá del gallegu y establecer mecanismos pa ponela en marcha "d'una manera intelixente", por eso afirma que lo que diz el PP equí sobre la oficialidá "nun ye verdá".

En declaraciones a Europa Press, el xurista llionés y espertu en llexislación llingüística afirmó que'l modelu d'oficialidá 'a l'asturiana' va tener que decidilo la Xunta Xeneral y va tener qu'afacese a la realidá asturiana. "Cada comunidá autónoma tien un modelu propiu dependiendo de les sos característiques sociales y culturales y eso ye lo que tien que facer Asturies, buscar cuál ye'l so camín", señaló.

Asina, l'espertu en llexislación llingüística afirmó que la oficialidá supón establecer que l'Alministración reconoz un idioma como llingua de comunicación cola ciudadanía. "Eso ye, los ciudadanos puen dirixise a l'Alministración nesta llingua y l'Alministración tien la obligación de responder nella", indicó'l xurista.

Pa Bartolomé, la oficialidá sí que tien vinculaes una serie d'obligaciones, "pero pa l'Alministración, non pa los ciudadanos". Asina, esplicó que les obligaciones son un tratamientu na enseñanza "que permita un conocimientu d'esi idioma en condiciones d'igualdá" y un tratamientu "afayadizu" nos medios de comunicación, "esto ye, con más consistencia de lo qu'agora hai". Amás, señaló que tamién ye necesario un llabor de promoción d'esa llingua "que permita equilibrar la presencia de la mesma".

"La oficialidá nun tien nengún problema porque ye reconocer derechos a los ciudadanos y que decidan llibremente si exercelos o non. Esto agora mesmu cola Llei d'Usu nun existe, porque l'usu a nivel social del asturianu ta llindáu porque nun se dan les mesmes oportunidaes a los falantes d'asturianu qu'a los de castellanu", indicó'l xurista.

Nesi sentíu, Bartolomé afirma que'l desarrollu de la oficialidá del gallegu ye una referencia "interesante". "Viendo lo que pasó en Galicia, lo que diz el PP col asturianu nun ye verdá", opinó. Esplica que'l desarrollu de la oficialidá del gallegu lleváronlo alantre gobiernos 'populares' y muestra qu'esto pue facese "d'una forma nada traumática y ensin necesidá de qu'un castellanofalante vea atacaos los sos derechos".

Asina, esplicó que na comunidá vecina foi'l PP, daquella Alianza Popupar (AP), los encargaos de diseñar la oficialidá al traviés d'una Llei de Normalización Llingüística, aprobada por unanimidá y que permitió introducir el gallegu na enseñanza, na alministración y nos medios de comunicación "ensin nengún problema".

LLEIS DE NORMALIZACIÓN

Les lleis de normalización autonómiques desarrollen les disposiciones de los Estatutos d'Autonomía referentes a la llingua. Asina, puen ser consideraes como les llinies directives de la política llingüística de les Comunidaes que declararon la oficialidá de la so llingua.

La llei gallega aprobóse unánimemente nel Parllamentu gallegu'l 15 de xunu de 1983, desenvuelve'l mandatu estatutariu y regula derechos de los ciudadanos a emplear el gallegu, incidiendo especialmente nos campos de l'Alministración, la enseñanza y los medios de comunicación.

En total, entre 1982 y 1988 aprobáronse lleis de normalización en seis comunidaes: Cataluña, País Vascu, Comunidá Valenciana, Navarra, Galicia y Isles Baleares. Foi nestes dos últimes comunidaes, onde'l PP cuntaba con mayoría, na que los populares encargáronse de llevar alantre'l procesu de desarrollar la oficialidá.

Por eso, Nicolás Bartolomé indicó que l'exemplu gallegu ye'l modelu a siguir "porque s'afitó d'una manera intelixente, ensin provocar nengún conflictu y normalizando al gallegu a unos niveles a los que nunca llegara esta llingua a nivel social". "Esta situación podría dase n'Asturies", afirmó'l xurista.

Asina, esplicó que nel casu d'haber oficialidá los castellanofalantes van siguir teniendo los mesmos derechos, "pero otra parte de la sociedá tamién los va a tener reconocíos, porque la oficialidá nun va contra naide".

Esta web utiliza cookies propias y de terceros para analizar su navegación y ofrecerle un servicio más personalizado y publicidad acorde a sus intereses. Continuar navegando implica la aceptación de nuestra política de cookies -
Uso de cookies