MADRID/UVIÉU, 26 Sep. (EUROPA PRESS) -
El portavoz parllamentariu d'IX n'Asturies, Gaspar Llamazares, punxo en cuestión la defensa que Podemos, Izquierda Unida y En Comú fixeron del referéndum independentista del 1 d'ochobre y avisó que si nun tien garantíes, como almiten estos partíos, "lo lóxico" ye nun participar.
Mentes qu'En Comú anima a participar nel referéndum del domingu y tanto Unidos Podemos como la dirección federal d'IU nun ven mal sumase al 1-O al entender que ye una movilización llexítima, el diputáu autonómicu asturianu discrepa y cree que nun entra secundar la iniciativa de los partíos independentistes.
Llamazares, que foi coordinador xeneral d'IX ente 2000 y 2008 y qu'agora lidera'l partíu Izquierda Abierta (IzAb) dientro de la organización, sorraya que "dalgo nun cuadra" nesi razonamientu, pues anque Unidos Podemos y En Comú asumen que'l 1-O nun tien garantíes y que nun tienen que reconocese los resultaos, coles mesmes animen o polo menos nun desaconseyen a los sos militantes sumase a la movilización.
"Dalgo nun cuadra: Si ye un referéndum unillateral y ensin garantíes, non pue llamase a participar pa depués nun reconocer los resultaos --escribió Llamazares nel so perfil de Twitter--. Si nun ye constitucional, y en consecuencia nun tien garantíes nin reconocencia, lo lóxico ye nun participar nin llexitimalo".
Con too, el coportavoz de IzAb pidió "actuar con claridá, dende la serenidá y el diálogu, y nun sumase a l'axitación nin a la esguilada patriotera", según figura n'otru mensaxe recoyíu por Europa Press.
EN LLINIA COL PARTÍU NUEVU D'ACTÚA
Esta posición de Llamazares refléxase tamién na posición de la Plataforma Actúa quE'l mesmu políticu asturianu y el ex xuez Baltasar Garzón rexistraron como partíu políticu esti branu. Nun comunicáu, esti partíu nuevu de la esquierda considera que'l referéndum del 1 d'ochobre nun pue definise nin como "movilización ciudadana" porque "vien impuesta y prediseñada polos partíos y grupos independentistes".
"Los qu'integramos Actúa afirmamos taxantemente que lo que se plantea'l 1 d'ochobre nin ye un referéndum, porque nun tien en cuenta garantíes (nin dispón d'un censu en condiciones), nin ye a cencielles la movilización ciudadana que defenden otros", asegura esta plataforma.
