Reconoz "resistencies" nel partíu pero asegura nun conocer la intención d'otros compañeros a ser candidatos al Principáu
UVIÉU, 24 Abr. (EUROPA PRESS) -
La Secretaria d'Organización de la FSA, Gimena Llamedo, nun quixo confirmar si'l Secretariu Xeneral de la FSA, Adrián Barbón, va ser candidatu socialista a la presidencia del Principáu. Coles mesmes, Llamedo esplicó que cuando'l Secretariu Xeneral del PSOE, Pedro Sánchez, dixo que Barbón sería'l candidatu al Executivu "namás dio la so opinión".
Llamedo llamentó que sigan existiendo "resistencies" dientro del partíu, y xustificó la decisión d'adelantar les primaries a esti mes de xunu esplicando que "a pesar del esfuerciu y del diálogu" nun se consiguió "la normalidá que nos gustaría nel partíu".
"Diéronse avances pero siguen existiendo resistencies y esto de dalguna manera fainos tomar la decisión de cerrar el debate. Ye'l momentu de que la militancia tome otra vuelta la palabra y asélese'l partíu", aseguró.
Gimena Llamedo, a entrugues de los medios sobre la posibilidá de qu'haya un candidatu alternativu que perteneza a eses "resistencies", afirmó nun conocer la intención "de nengún compañeru" de postulase a les elecciones primaries.
Finalmente, y a pesar de la pitición de les Mocedaes Socialistes d'Asturies de que les primaries sían abiertes, la Secretaria d'Organización anunció que van ser cerraes porque "la militancia ye la meyor interlocutora cola sociedá".
La Comisión Executiva Autonómica de la FSA-PSOE aprobó esti llunes por unanimidá la so propuesta de calendariu pa les primaries a la presidencia del Principáu d'Asturies. La Comisión Executiva Federal ratificó esta propuesta y va esplicala nel Comité Autonómicu que se va celebrar el sábadu. Asina, va escoyese candidatu a la presidencia del Principáu'l domingu, 10 de xunu de 2018.
