UVIÉU, 3 de Mayu (EUROPA PRESS)
La lletrada del Principáu, Isabel González Cachero, abrió esti llunes les declaraciones de los testigos nel xuiciu pol llamáu casu Marea, y manifestó que "nun conoz nengún espediente pagáu con factures falses", nin tuvo nunca conocencia de que dalgún conseyeru o director xeneral diera la orde de pagar una factura.
Añadió que los funcionarios saben que nun se dan eses ordes y que si les recibieren tendríen la obligación de nun cumpliles y poneles en conocencia de Fiscalía, dao que tán obligaos a ello pol estatutu del funcionariu públicu. "Nunca recibí nenguna orde d'esi tipu nin conozo nengún compañeru que la recibiera", repitió la lletrada del Principáu.
González Cachero tuvo que comparecer tamién como testigu, al llamala a declarar la defensa de la funcionaria Marta Renedo, dao que la lletrada ocupaba nel 2007 el cargu de Secretaria Xeneral Técnica de la Conseyería de Cultura, de la que dependía l'acusada.
La daquella Secretaria Xeneral Técnica de Cultura aseguró que "la so única conversación" cola acusada Marta Renedo foi pa dici-y que la conseyera nun contaba con ella y que diba cesala. "Comuniqué-ylo por una cuestión de cortesía", añadió.
De la mesma manera, asegura nun saber "absolutamente nada" de los espedientes que tienen que ver col centru de Belén de La Montaña, --unu de los que s'inclúi na causa-- y tolo que sabe del mesmu conociólo pola instrucción. "Mal podía velar pola llegalidá d'un espediente que desconocía absolutamente", dixo González Cachero.
Manifestó que, al contrario de lo que declaró Marta Renedo, nun existía un rexistru de resoluciones como tal con una regulación propia, y insistió nel so desconocimientu sobre los espedientes que s'inclúin na causa que se xulga, como por exemplu'l de la Biblioteca d'El Fontán, qu'indicó que cuando ella llegó a Cultura yá taba inauguráu. Amás aseguró que desconoz lo que faen los conseyeros o directores xenerales cuando asumen la so cartera.
González Cachero indicó que nun-y consta que s'utilizaren remanentes de Tesorería de forma inapropiada nes conseyeríes y negó que recibiera orde dalguna de facturar antemanadamente daqué, nin de facturar en falso pa zarrar l'exerciciu.
