UVIÉU, 21 de Xunetu (EUROPA PRESS)
La directora xeneral de Recursos Naturales, Fina Álvarez, asistió esti llunes a la suelta de dos frangüesos nel Parque Nacional de los Picos d'Europa, dientro del programa de reintroducción d'esta especie que se lleva a cabu al traviés del proyectu Life+ de cooperación interterritorial de la Unión Europea.
Nesi mesmu entornu yá vuelen otros dos exemplares, Deva y Atilano, lliberaos pola Fundación pa la Recuperación del Frangüesos n'años anteriores.
Álvarez destacó, nuna nota prensa posterior, la collaboración ente'l Parque Nacional de Picos d'Europa y el Parque Nacional d'Ordesa, d'onde proceden los exemplares, pa trabayar na recuperación de la especie. Coles mesmes, resaltó'l llabor desarrolláu pol Gobiernu d'Aragón nesti proyectu, asina como pola Fundación pa la Recuperación del Frangüesos.
Nesti programa de reintroducción, dotáu con 1,4 millones, participa'l Gobiernu del Principáu, dientro del Consorciu del Parque Nacional de los Picos d'Europa, xunto colos gobiernos de Cantabria y Castiella y Lleón. El Consorciu del Parque Nacional de los Picos d'Europa aporta 106.000 euros, de los que'l 43% entrególu'l Gobiernu asturianu. Tamién participa l'Executivu d'Aragón, que cedió los exemplares pal so reintroducción y qu'invierte 106.000 euros, asina como'l Ministeriu d'Agricultura, al traviés de Parques Nacionales, qu'aporta otros 106.000 euros; 240.00 euros más entrégalos la Fundación pa la Recuperación del Frangüesos y el restu cuerre al cargu de la Unión Europea.
L'oxetivu ye recuperar una especie qu'habitaba los Picos d'Europa hasta mediaos del sieglu XX. En concreto, l'últimu exemplar del que se tien constancia n'Asturies data de 1956.
