UVIÉU, 26 d'Abril (EUROPA PRESS)
La Conseyería de Desarrollu Rural y Recursos Naturales del Gobiernu d'Asturies punxo en conocencia de Fiscalía l'informe correspondiente a la necropsia practicada a los restos del osu pardu cantábricu topáu en Mual (Cangas) el 7 de xineru. L'animal morriera por intoxicación al inxerir unes setes, según los analís.
L'exame, dirixíu por Juan Francisco García Marín, catedráticu d'Anatomía Patolóxica de la Facultá de Veterinaria de la Universidá de Llión, señala que les alteraciones permiten abarruntar que'l cadabre manipulóse y descarnóse dempués de la muerte, sin l'actuación (o d'escasa importancia) d'alimañes o depredadores.
Los especialistes establecen que l'animal tenía unos seis años y pesaba ente 90 y 101 quilos. L'osu morrió presumiblemente ente quince y 72 hores primero que los sos restos fueren recuperaos, anque nesti puntu los espertos nun son categóricos
Por ello, encamentó realizar un nuevu estudiu de los restos calteníos, que va efectuar el mesmu equipu que participó na necropsia.
La existencia de piel llendábase a la cabeza, zona distal de les estremidaes posteriores (dende la zona media de la tibia) y dalgún fragmentu nel torsu, y nun se observaben fragmentos en tola zona dorsal. Los restos de piel nun presentaben esgarrios y paecíen tar cortaos nos sos cantos, cortes que los espertos consideren que pudieron realizase tres la muerte.
Na zona frontera de la cabeza, la piel presentaba un furu con cantos quemaos y destrucción del güesu de forma irregular, aparentemente con un ralláu na so superficie que pudo facese tanto antes como dempués de la muerte.
L'informe establez que les lesiones nos órganos podríen ser compatibles con una intoxicación aguda-subaguda por consumu d'hongos del xéneru amanita y un shock endotóxicu final.
