PARÍS, 18 de Xunu (EUROPA PRESS)
Los partíos qu'apoyen al presidente francés, Emmanuel Macron --La República en Marcha y Movimientu Democráticu-- llograron polo menos 294 escaños na nueva Asamblea Nacional y garanticen asina la mayoría absoluta al inquilín del Eliseu, según datos oficiales del Ministeriu del Interior. L'Asamblea Nacional francesa ta integrada por 577 asientos.
Col 92 por cientu del escrutiniu, LREM y MoDem tienen garantizaos 294 diputaos na Asamblea Nacional, mientres que Los Republicanos llogren 103 asientos. Per detrás queden el Partíu Socialista francés (PS) con 27 escaños; La Francia Insumisa y el Partíu Comunista Francés, con 18 puestos, y el Frente Nacional con 8 representantes confirmaos.
"Distis una mayoría clara al presidente de la República y al Gobiernu", afirmó'l primer ministru francés, Edouard Philippe, según recueye la prensa francesa. "Los franceses prefirieron la esperanza a la ira", repostió.
El primer ministru y aliáu de Macron sorrayó que naide va un añu podría imaxinar "renovación tala de la política". Sicasí, reconoció que "l'astención nun ye una bona noticia pa la democracia".
