UVIÉU, 23 d'Ochobre (EUROPA PRESS)
Los mandos de Bomberos d'Asturies anunciaron que suspenden el so enzarru, dempués de caltener esti miércoles una xunta col conseyeru de Presidencia, Guillermo Martínez. Mientres la xunta, los mandos esplicaron que Martínez comprometióse a meyorar el funcionamientu del serviciu.
El voceru de los mandos, Pablo López, indicó en nota prensa que pa meyorar el serviciu, dende Presidencia van incluyir les sos demandes nel desarrollu de la futura Llei d'Emerxencies del Principáu d'Asturies.
Nesti sen Martínez "garantizó" a los mandos que nel periodu que trescurra hasta que s'apruebe la Llei d'Emerxencies, ferramienta básico pal futuru del SEPA, van revisase los procedimientos operativos pa poder resolver les emerxencies con más eficacia y xestionar el serviciu de forma organizada y sin frayar los parámetros de seguridá.
Por ello los mandos decidieron suspender l'enzarru qu'entamaren hai 13 díes, el pasáu 10 d'ochobre, cuando se zarraron nes dependencies del Serviciu d'Emerxencies del Principáu d'Asturies de La Morgal en contra de la xestión del serviciu.
"Na xunta Martínez comprometióse a analizar les nueses reivindicaciones", señaló López. Por ello, "como muestra de bona fe" los doce mandos zarraos decidieron suspender la so concentración, pa otorgar un votu "de confianza" al dirixente políticu, "esperando que cumpla los compromisos alquiríos".
