UVIÉU, 24 d'Abril (EUROPA PRESS)
El Ministeriu d'Agricultura, Alimentación y Mediu Ambiente anunció esti xueves que va invertir más d'un millón d'euros na protección de la playa de Peñarrubia en Xixón. El proyectu de la Dirección Xeneral de Sostenibilidá de la Costa y del Mar, tien por oxetivu asegurar la playa frente a argayos y meyorar el so entornu y accesos nun plazu d'execución de seis meses.
Según informó'l Ministeriu al traviés d'una nota prensa, les característiques xeolóxiques del cantil que bordia la playa de Peñarrubia dieron llugar a avezaos argayos que comprometieron seriamente la seguridá de los usuarios del llugar.
N'ocasiones anteriores optóse por instalar malles de protección (depósitu de tierra o piedra que cai de llugares elevaos) na zona, pero diches malles nesti momentu alcuéntrense "bien deterioraes" y nun cumplen cola so función de seguridá.
El proyectu plantega la ubicación de nueves malles cosíes con rede de cables d'aceru. Amás, na parte alta va executase una turria reforzada retirándose 4.000 metros cúbicos de tierres. Yá na zona inferior va instalase una barrera dinámica de contención, creando una nueva rede de drenaxe qu'intercepte les agües de filtración.
El proyectu tamién inclúi la construcción d'un tramu d'escaleres a base de formigón, encacháu de piedra y barandiella de madera. En total va actuase sobre cerca de 5.000 metros cuadraos de cantil y 100 m.l. d'escalera, con revexetación de 1.500 metros cuadraos de fastera. Na zona axunta van asitiase meses con bancos de madera rústica y van instalase trés columnes de lluz coles sos lluminaries correspondientes.
