MADRID, 19 de Xunetu (EUROPA PRESS)
L'expresidente de Caja Madrid Miguel Blesa, topáu muertu esti miércoles con un disparu nel pechu na finca Puerta del Toro de Villanueva del Rey (Córdoba) a les 8.40 hores, aterrizó na presidencia del conseyu d'alministración de la caxa d'aforros madrilana en 1996, de la mano del expresidente del Gobiernu José María Aznar, p'abandonar la entidá 13 años dempués, nos entamos de la crisis financiera, sin poder cumplir col so oxetivu de consolidar la internacionalización de la entidá mientres el so mandatu.
Llicenciáu en derechu pola Universidá de Granada, Miguel Blesa preparó les oposiciones al Cuerpu d'Inspectores Financieros y Tributarios del Estáu xuntu al qu'a lo último diba ser presidente del Gobiernu, José María Aznar.
Sin esperiencia previa en banca, a Blesa designáronlu presidente de Caja Madrid en 1996 y mientres la so xestión, el capítulu más polémicu foi la compra del City National Bank de Florida en septiembre del 2008, operación promovida pol mesmu Blesa y que lu llevó a la cárcel en dos causes por mor de la investigación del creitu de 26 millones d'euros concedíu al expresidente de la CEOE, Gerardo Díaz Ferrán.
Sicasí, la causa que desaguó na posterior inhabilitación del xuez Elpidio José Silva, quedó finalmente archivada n'ochobre del 2015 al considerase que la compra del bancu estaounidense nun foi arriesgada y qu'inclusive tuvo resultaos positivos.
Caja Madrid zarró la compra del City National Bank de Florida por 1.127 millones de dólares (977 millones d'euros al cambiu actual) y Bankia vendió la entidá en mayu del 2013 por 882 millones de dólares (765 millones d'euros).
Blesa abandonó la presidencia de Caja Madrid na Asamblea Xeneral celebrada'l 28 de xineru del 2010, qu'escoyó al exministru d'Economía y ex director xerente del Fondu Monetariu Internacional (FMI) Rodrigo Rato como'l so socesor, tres oponese la expresidenta de la Comunidá de Madrid Esperanza Aguirre a la reelección de Blesa.
La marcha del expresidente de Caja Madrid foi anterior al acuerdu d'integración selláu'l 30 de xunetu del 2010 por Caja Madrid con otres seis caxes --Bancaja, La Caja de Canarias, Caj de Ávila, Caixa Laietana, Caja Segovia y Caja Rioja-- pa crear Bankia, que salió a Bolsa'l 20 de xunetu del 2011.
Nes sos últimes palabres como presidente de Caja Madrid, Blesa mostróse satisfechu de la so xestión y destacó el "saltu cualitativu" dau pola caxa dende 1996 hasta'l 2009 y "la trayectoria estraordinaria" entamada. En concreto, mostróse especialmente arguyosu de la penetración llograda pola caxa nel estranxeru.
Miguel Blesa, que'l próximu 8 d'agostu diba cumplir 70 años, nació en 1947 na población de Linares, na provincia de Jaén y morrió na xornada previa a que se cumplan seis años dende la salida a Bolsa de Bankia.
TARXETES BLACK
Va cinco meses, Blesa resultó condenáu pola Audiencia Nacional a seis años de cárcel pol usu presuntamente fraudulentu que fizo de la so tarxeta black. Recurrió la resolución non firme énte'l Tribunal Supremu, que taba pendiente de pronunciase sobre la mesma.
Según informaron a Europa Press en fontes de la so redolada, Blesa nun taba nos últimos díes desanimáu nin ablayáu, anque esmolecíu dacuando pola batalla xudicial qu'encaraba dende va años.
Estes fontes destaquen que'l fallecimientu de Blesa prodúxose nun momentu que nun yera'l peor pal exbanqueru, dao que tenía "series esperances de que'l Tribunal Supremu diéra-y la razón nel casu de les tarxetes black, en recurriendo la pena de prisión de seis años que-y impunxo l'Audiencia Nacional.
Tocantes a la comercialización indiscriminada de participaciones preferentes, un productu namás aptu pa inversores especializaos, al traviés de la rede comercial de la caxa, los abogaos del exbanqueru taben convencíos de que duiba zarrase tamién sin consecuencies
Amás, l'expresidente de Caja Madrid tenía otra causa pendiente polos sobresueldos presuntamente irregulares que s'otorgaron na caxa estinta.
