XIXÓN, 1 d'Agostu (EUROPA PRESS)
L'alcaldesa de Xixón, Carmen Moriyón (Foru), acusó esti vienres a la naviera LD Lines de venir cobrar la sovencióin d'ayudes europees que s'otorgaba a la implantación de l'Autopista del Mar ente Xixón y Nantes (Francia) para depués marchar a los cuatro años. Una posibilidá sobre la que yá s'alvirtió nel 2010 y qu'agora se constató, al so paecer.
Asina lo indicó nel Plenu dempués de que la conceyala del PP Maite Menéndez, mientres un ruegu, acusárala directamente de ser "copartícipe" del posible fracasu de la llinia marítima y quexárase de qu'agora toos quieren culpar a Puertos del Estáu cuando ésti ta faciendo "esfuerzos" pa la continuidá de "l'autopista del mar".
Moriyón, coles mesmes, calcó en que'l contratu de la llinia marítima marcaba 30 millones d'euros de sovenciones y criticó que nun hubiera un "siguimientu estrictu" sobre esto. Sicasí, puntualizó que'l Gobiernu nacional tien un aval de cinco millones d'euros col que pue presionar a la naviera por que xustifique los sos gastos y la so situación financiera.
"Nun faiga demagoxa con too", encamentó a Menéndez, a la qu'indicó que "pol tonu, la incoherencia y por tolos despropósitos qu'acaba de dicir" nun diba aceptar el ruegu, que consistía en que l'alcaldesa esplicara les xestiones feches o que va facer el Gobiernu Municipal pa favorecer la continuidá de la llinia marítima.
Insistió, amás, en que la esplotación de l'Autopista del Mar ye un negociu privao sovencionáu del que son responsables los Gobiernos d'España y Francia, al tiempu qu'aludió a la Comisión Intergubernamental que tendría que controlar les ayudes y que se reunió va unos meses la primer vez nestos casi cuatro años.
Ye por ello, que desvinculó'l posible fracasu de l'Autopista del Mar de l'actuación de l'Autoridá Portuaria de Xixón, que tuvo que solicitar ser accionista pa poder acceder a información de la citada llinia. Tamién remarcó que les acciones comerciales realizaes pola Autoridá Portuaria diben orientaes a "vender el Puertu", al tiempu que se comunicó a la naviera los fallos na comercialización que se detectaron.
Unío a esto, calcó en que naide ta faltando a Puertos del Estáu, sinón que se-y ta encamentando que contribuya a que siga l'Autopista del Mar Xixón-Nantes, dao que ye "vital" pa Xixón y Asturies.
