UVIÉU, 28 de Setiembre (EUROPA PRESS)
L'expresidente d'Israel Shimon Peres morrió esti miércoles a los 93 años d'edá tres nun poder superar la hemorraxa cerebral sufrida va dos selmanes.
"Con gran pesar confirmamos el fallecimientu del expresidente y ex primer ministru Shimon Peres. Israel perdió a un padre fundador, una lluz pola paz", dixo l'Axencia de Noticies d'Israel al traviés de la so cuenta na rede social Twitter.
Peres permanecía ingresáu nel Centru Médicu Sheba de la población de Tel Aviv y sufriera un grave deterioru del so estáu nes últimes hores.
Va dos selmanes, Peres empezó a sentise mal y, tres l'encamientu d'un médicu personal, acabó nun hospital. Una vez ellí, los médicos ficiéron-y un escáner que reveló una hemorraxa cerebral y un infartu de miocardiu, polo que decidieron induci-y una coma pa poder aplica-y el tratamientu médicu correspondiente.
Peres yá tuviera hospitalizáu hasta dos veces esti añu por problemes cardiacos. Retiróse nel 2014 dempués d'ocupar los cargos de presidente y primer ministru. Ente los sos llogros destaca ser unu de los arquitectos de los Acuerdos d'Oslu, que-y valieron un Nobel de la Paz con Isaac Rabin y Yasir Arafat.
