UVIÉU, 30 de Xineru (EUROPA PRESS)
Una persona morrió y otros dos resultaron firíes nun accidente de tráficu rexistráu na A-8, al altor del puntu kilométricu 486, en sentíu Uviéu, nel conceyu de Cuaña. Nel accidente viéronse implicaos un turismu y dos camiones.
Según los datos facilitaos pol Serviciu d'Atención Médica Urxente (SAMU) los dos mancaos son dos varones de 61 y 52 años d'edá. Recibieron atención nel llugar del accidente pol equipu d'Atención Primaria de Navia y treslladáronlos na ambulancia de soporte vital básicu al Hospital de Xarrio. A falta de más pruebes y hasta nueva valoración médica'l so pronósticu ye reserváu.
El fináu viaxaba como acompañante nel turismu implicáu nel accidente, matrícula O-3532-BS. Los sos restos mortales, en recibiendo la correspondiente autorización, escarceláronlos de debaxo del camión efectivos de Bomberos del Serviciu d'Emerxencies del Principáu d'Asturies (SEPA) con base nel parque de Barres.
Los bomberos tamién tuvieron qu'estabilizar la carga de madera d'unu de los vehículos implicaos nel accidente y taponaron, nesti mesmu camión, una fuga de gasóil procedente del depósitu de combustible.
El Centru de Coordinación d'Emerxencies del 112-Asturies recibió l'avisu a les 07.47 hores d'esta mañana. Na llamada señalaben qu'un camión de madera topetara contra una grúa d'asistencia en carretera y un turismu topetara contra ésti. Darréu un tercer camión topetó contra'l turismu onde había una persona atrapada.
La Sala 112 del SEPA, amás de pasar l'avisu al SAMU y a la Guardia Civil, moviliza una dotación, compuesta por trés efectivos, de Bomberos del SEPA con base nel parque de Barres, que se tresllada al llugar col vehículu de primera salida y el furgón multisocorru.
A les 08.09 informen que la persona que ta atrapada ta muerta polo qu'esperaren la correspondiente autorización xudicial pa proceder a la so escarcelación. Comuniquen qu'estabilizaron la carga d'unu de los camiones que tresportaba madera y tamién tán procediendo a sellar la fuga del depósitu de combustible d'esti mesmu camión.
A les 08.49 hores, tras autorizales, procedióse a rescatar los restos mortales de la persona finada.
