BENGHAZI (LLIBIA), 15 Sep. (Reuters/EP) -
Una embarcación con unos 250 emigrantes naufragó esti domingu cerca de les mariñes llibies cuando intentaben cruciar el Mediterraneu escontra Europa, según informó la Marina llibia. Hasta'l momentu namás 26 persones fueron rescataes y camiéntase que munchos de los emigrantes pudieren tar muertos.
El voceru de la Marina llibia, Ayub Qassem, detalló que la embarcación naufragaría cerca de la ciudá de Tajura, a unos catorce kilómetros al este de la capital del país, Trípoli. "Hai munchos cadabres flotando na mar", añedió Qassem.
La guardia costera trabaya pa tratar de rescatar a dellos emigrantes, sicasí, como denuncia'l funcionariu llibiu, "cuenta con bien pocos recursos pa buscar supervivientes". Esta guardia ta conformada por barcos de pesca y 'remolcadores' que tomen emprestaos del Ministeriu de Petroleu.
Solamente nel añu 2014 más de 100.000 emigrantes --la mayoría d'ellos d'orixe africanu-- llegaron a les mariñes italianes, según confirmó'l gobiernu italianu esta mesma selmana.
Los traficantes de persones taríen esplotando'l caos políticu y la falta de seguridá que vive Llibia dende la cayida de Muammar Gaddafi, derrocáu nun llevantamientu armáu en 2011, según indica l'axencia de noticies Reuters.
