WASHINGTON, 18 de Xineru (EUROPA PRESS)
El presidente saliente d'Estaos Uníos, Barack Obama, aprovechó la so última rueda de prensa antes d'abandonar el cargu, el próximu 20 de xineru, pa defender un legáu que'l so socesor, Donald Trump, anunció que va desmontar nos primeros meses de Gobiernu.
Obama compareció esti miércoles la última vez, dempués d'ocho años, na sala de prensa de la Casa Blanca, y usó les sos primeres palabres pa valorar el trabayu de los medios de comunicación, a los que Trump amenazó con veta-yos l'accesu a la sede de Gobiernu.
"Tenevos nesti edificiu fizo que funcione meyor, fízonos trabayar más duro, ser honestos", dixo, de la qu'almitió que nun-y prestaron "caúna de les histories que se publicaron", magar asumió que los periodistes nun pueden ser "combayones".
A preguntes de los corresponsales na Casa Blanca fizo un repasu de les sos midíes más importantes. La mayoría d'elles va tornales el magnate neoyorquín, qu'anunció ordes executives derogatories dende'l primer día de mandatu.
Asina, defendió la conmutación de la pena a Chelsea Manning, la exmilitar condenada a 35 años de cárcel por filtrar decenes de miles de documentos clasificaos a Wikileaks. "Fízose Xusticia", consideró, recordando que yá cumplió siete años d'una pena "bien desproporcionada". Amás, refugó qu'esti perdón puea animar a otros a facer pública información secreta.
Tamién se refirió a otru de los sos polémicos movimientos na recta final de la so Presidencia: l'astención estaounidense que permitió aprobar una resolución contra los asentamientos israelinos nel Conseyu de Seguridá de Naciones Uníes.
Obama esplicó que l'oxetivu yera "enviar una señal d'alerta" porque taba creándose una realidá sobre'l terrenu que "fairía imposible la solución de los dos estaos", que defendió como única opción pa la paz ente israelines y palestinos.
"Nun podemos forzar a les partes a llegar a la paz", afirmó, magar señaló que la situación actual "ye insostenible" porque supón una amenaza pal mesmu Estáu d'Israel, por cuenta de la fola de violencia entamada.
Sobre Rusia --país al que les axencies d'Intelixencia acusaron d'interferir nes últimes elecciones presidenciales pa favorecer la victoria de Trump--, Obama indicó que "va nel interés d'Estaos Uníos y del mundu tener una relación constructiva".
Sicasí, mostróse partidariu de caltener les sanciones contra Rusia pola intervención nel conflictu armáu d'Ucrania y l'anexón de la península de Crimea, porque "sigue violando les normes internacionales". "Asina dexen de faelo, van eliminase", caltuvo.
