WASHINGTON, 7 d'Ochobre (Reuters/EP)
El presidente d'Estaos Uníos, Barack Obama, llamó per teléfonu a la presidenta de Médicos Sin Fronteres (MSF), Joanne Liu, pa pidir perdón pol bombardéu que les tropes norteamericanes efectuaron el pasáu sábadu sobre l'hospital que la ONG tien na ciudá afgana de Kunduz.
El voceru de la Casa Blanca, Josh Earnest, reveló qu'Obama aseguró a Liu que "va haber una investigación tresparente, oxetiva y rigorosa sobre los fechos y les circunstancies del incidente".
"Y, si fuera necesario, comprometióse a implementar cambios pa que traxedies como éseta nun puean repitise nel futuru", dixo na rueda de prensa diaria.
Earnest tamién esplicó qu'Obama llamó per teléfonu al presidente afganu, Ashraf Ghani, pa espresar les sos condolencies pol personal sanitario y los pacientes que morrieron nel ataque aereu.
Aviones estaounidenses bombardiaron el sábadu l'hospital de MSF en Kunduz, dexando un saldu de 22 muertos, nel marcu de les operaciones de combate llevaes a cabu en coordinación coles fuerces afganes pa espulsar a los talibán.
MSF asegura que'l 29 de setiembre informara lo mesmo a les fuerces estaounidenses como a les afganes de la llocalización exacta del hospital y que, hasta media hora dempués d'avisar de les primeres bombes a los dos mandos, los proyectiles siguieron cayendo.
El Gobiernu de Barack Obama almitió l'ataque aereu, pero cambió de versión. Primero dixo que foi un "error" y agora asegura que'l bombardéu llevóse a cabu a pidimientu de les tropes afganes, que los informaron que taben sufriendo un ataque dende esa posición.
