MADRID, 26 de Xunetu (EUROPA PRESS)
El Conseyu de Seguridá de Naciones Uníes adoptó esti llunes una resolución pola qu'estiende'l mandatu de la Misión d'Asistencia pa Iraq (UNAMI) mientres un añu más, hasta'l mes de xunetu del 2017.
Na so resolución, el Conseyu anuncia que se decidió, a pidimientu del Gobiernu d'Iraq, qu'amás de la Unami tamién el representante especial de la Secretaría Xeneral de la ONU pal país, Jan Kubis, va siguir col so mandatu.
L'órganu pidió al Gobiernu que, en base a la importancia de la seguridá del personal de la ONU pa que la Unami puea desarrollar el so trabayu, siga ofreciendo seguridá y apoyu loxísticu al personal de l'axencia esplegáu nel país.
Nesti sen, nun comunicáu publicáu pola ONU, el Conseyu dio la bienvenida a les contribuciones de los estaos miembros pa ofrecer recursos de seguridá, loxísticos y financieros necesarios pa cumplir la so misión, y pidió-yos que sigan faciéndolo.
PREOCUPACIÓN POL ESTÁU ISLÁMICU
Coles mesmes, el Conseyu sorrayó la importancia de la estabilidá y la seguridá del país pal pueblu iraquín, y repitió la so "fonda preocupación" pola situación actual que vive'l país "como resultáu de la continua presencia y de l'amenaza de grupos terroristes", sobremanera del autodenomináu Estáu Islámicu.
Nesti sen, el Conseyu de Seguridá sorrayó que la presencia d'esti grupu en suelu iraquín ye "la mayor amenaza" pal futuru del país, y alvirtió que la única manera de poner fin a esta amenaza ye "trabayar xuntos" p'atender a les necesidaes en cuestión de seguridá, según al ámbitu políticu.
SITUACIÓN HUMANITARIA
Sicasí, nun pasó desapercibida pal Conseyu de Seguridá la crisis humanitaria que vive la rexón, y el Conseyu recalcó na necesidá de tratar los desafíos humanitarios a los que s'enfrenta'l pueblu iraquín.
La protección de "los civiles afectaos", ente ellos los neños, muyeres y miembros de minoríes étniques y relixoses tendríen que ser una prioridá en cuestión de seguridá, indicó, y encamentó a crear les condiciones pa una torna de los refuxaos y "desplazaos internos de manera voluntaria, segura y digna", particularmente n'árees acabantes de lliberase de manes del grupu, como la ciudá de Faluya, reconquistada'l pasáu mes de mayu.
