MADRID, 16 d'Agostu (EUROPA PRESS)
Naciones Uníes declaró, nuna situación sin precedentes, el máximu nivel d'emerxencia humanitaria, conocíu como'l 'Nivel 3' d'emerxencia, en cuatro de les crisis humanitaries mundiales (Iraq, Sudán del Sur, Siria y República Centroafricana), tres elevar, esti miércoles, l'actual crisis humanitaria n'Iraq al máximu nivel, según recoyó la revista 'Foreign Policy'.
"Nun vi nada d'esta envergadura con anterioridá", declaró'l conseyeru de polítiques humanitaries d'Oxfam Estaos Uníos, Noah Gottschalk, qu'especificó que "la comunidá humanitaria enfréntase a ún de los peores momentos, dao que se dan delles crisis de manera simultánea y toes elles provocaes pol home". A pesar de que les crisis tienen repercusiones humanitaries, Gottschalk aseguró que "les úniques víes de solución son polítiques".
Según Gottschalk, los contribuyentes y donantes son más roceanos a les crisis humanitaries provocaes pol home qu'a les provocaes por desastres naturales, polo qu'estes cuatro situaciones, toes de naturaleza política, nun tienen financiación abondu pa facer frente a los problemes humanitarios.
La declaración del Nivel 3 d'emerxencia respuende al máximu nivel d'alerta de la ONU y desígnala un comité formáu por representantes de les organizaciones humanitaries más importantes de la ONU y otres instituciones de relevancia. L'estáu d'emerxencia ta pensáu p'asegurar que cuando la escala, l'algame y la complexidá d'una crisis ye de grandes proporciones, la comunidá humanitaria dea los pasos afayadizos pa priorizar los recursos. Tamién acelera la financiación que se dedica a estos conflictos.
