UVIÉU, 2 de Setiembre (EUROPA PRESS)
La Orden Hospitalaria de San Juan de Dios (OHSJD) ye la galardonada col Premiu Princesa d'Asturies de la Concordia 2015, últimu de los ocho galardones internacionales que convoca esti añu la Fundación Princesa d'Asturies y que cumplen con ésta la so XXXV edición. Esta candidatura proxpúnxola Marta Elvira Rojo, miembru del xuráu del Premiu Princesa d'Asturies de Ciencies Sociales 2015.
La Orde Hospitalaria de San Juan de Dios ye una organización internacional qu'empresta cuidaos sanitarios a los más precisaos, sin distinción de creencies. Ye una institución sin ánimu d'arriquecimientu, católica, que forma parte de la Ilesia y que tien la espresión de la so filosofía na hospitalidá y na humanización de l'asistencia. Fundóla en Granada en 1593 Juan Ciudad, qu'estableció'l primer hospital dedicáu a l'atención d'enfermos probes, financiáu con donaciones.
Al acabar el sieglu XVI creárense más de 50 centros hospitalarios, principalmente n'España ya Italia. Siguió la so espansión poles colonies españoles n'América y por Europa (al rematar el sieglu XVIII). Hospitalarios fueron los primeros n'inaugurar un centru de cuidaos paliativos en China, en Yan-Ji, nel 2004. Nesti momentu la Orde asisti cada añu a 27 millones de persones.
Cola adaptación del so trabayu a los requerimientos de cada época, la Orde Hospitalaria de San Juan de Dios caltuvo la solidez del so serviciu, sobremanera en cuidaos paliativos, realizando un especial esfuerzu mientres la epidemia del ébola declarada en dellos países d'África nel 2014.
La Orde Hospitalaria y Juan Ciudad ONGD llanzaron entós la campaña 'Paremos l'ébola n'África del Oeste' -el virus yá causara 518 muertos-, solicitando donaciones pa los sos hospitales en Lunsar (Sierra Lleona) y Monrovia (Liberia), pa l'adecuación de les árees d'aislamientu y l'alquisición de materiales. Dambos hospitales clausuráronse pa desinfección y cuarentena.
Parte del so personal resultó contaxáu y morrieron 18 hermanos y collaboradores. La Orde persistió nel trabayu pa la rápida reabertura de los dos centros, cola formación del personal sobre protocolos de seguridá frente al virus, en coordinación coles autoridaes sanitaries y otres instituciones internacionales y siguió emprestando información y asistencia a families en cuarentena (alimentos, medicines y apoyu psicolóxico).
Esti añu, la OHSJD cuenta con 350 centros, más de 70 en 27 países probes de los 53 nos que ta presente, y dispositivos sociales y sanitarios pa la intervención nos ámbitos hospitalariu, ambulatoriu, de salú mental, discapacidá, xeriátricu y social. Nesti últimu, empresta atención a emigrantes, persones sin casa, en riesgu d'esclusión social, enfermos de sida o drogodependientes.
La so eficiencia asistencial caltiénse cola actualización constante de les estructures y del puxu a la investigación y formación sanitario y social. Ta compuesta por más de mil hermanos que trabayen xunto con 55.000 profesionales y cerca de 9.000 voluntarios. Cuenta con más de 300.000 benefactores-donantes, qu'empresten la so ayuda económica al traviés de donaciones particulares, periódiques o puntuales, y en forma d'herencies.
La OHSJD tien hermanamientos con instituciones y organizaciones llocales pal desarrollu de dellos programes d'acción. Nos últimos años, ayudaron a les víctimes del terremotu en Perú (2007), del tifón Yolanda en Filipines (2013) y a les más vulnerables de la crisis económica n'España. En xineru del 2015 recibió'l Premiu Ciudadanu Européu 2014, qu'otorga'l Parlamentu Européu.
