UVIÉU, 24 Sep. (EUROPA PRESS) -
La Plataforma d'Afectaos pola Hipoteca (PAH) d'Uviéu denunció l'incumplimientu del Xulgáu del conveniu pa la prevención de desallugos, qu'obliga a comunicar a los servicios sociales municipales les situaciones d'especial vulnerabilidá o esclusión social, depués de conocer qu'un matrimoniu de 74 y 72 años durmió nel parque San Francisco dos nueches depués d'un desallugu.
Nuna nota de prensa la PAH esplicó que'l 18 de setiembre un xulgáu d'Uviéu executó'l desallugu del matrimoniu, con ingresos, provenientes d'una pensión non contributiva que nun-yos permitió costear l'arriendu de la vivienda na que vivíen.
Al nun tener agospiu alternativu, "desamparaos dafechu y conmocionaos pola situación", pasaron dos díes y dos nueches nun bancu del Parque San Francisco, hasta qu'integrantes de la Plataforma d'Afectaos pola Hipoteca d'Uviéu conocieron el so estáu y, col so apoyu, foron a un agospiu "provisional y precariu" mentes se xestiona énte los servicios sociales municipales una solución definitiva.
La Plataforma d'Afectaos pola Hipoteca d'Uviéu va solicitar una xunta al Decanu de los Xulgaos d'Uviéu pa tresllada-y esta situación.
