UVIÉU, 30 Sep. (EUROPA PRESS) -
El decanu de los embaxadores de la Lliga Árabe y embaxador d'Arxelia n'España, Mohamed Haneche, destacó la necesidá d'importar tecnoloxía p'aplicar el modelu de pequeñes y medianes empreses (pymes) operativu n'Asturies y Europa nel so conxuntu, nos países orientales.
Na inauguración de la segunda xornada del Alcuentru Comercial ente'l Principáu d'Asturies y embaxadores de la Lliga Árabe, el representante de los embaxadores destacó la necesidá de trabayar con pymes pa completar el texíu industrial de los sos países.
"Queremos importar tecnoloxía, poder aprender colos socios sobre cómo se desenvuelven les pymes", manifestó. Coles mesmes felicitó al presidente del Principáu, Javier Fernández, y al Gobiernu nacional por impulsar midíes que "dexen y aseguren" la esternacionalización d'empreses españoles. "Esto anímanos y ayuda enforma pa esforcianos na cooperación", aprofió Haneche.
Pela so parte, el presidente asturianu destacó la importancia de la visita de los embaxadores a la rexón, asegurando qu'esti alcuentru ye "una gran oportunidá en beneficiu mutuu" pa dambes partes. Coles mesmes, destacó la internacionalización como una estratexa pa desaniciar la crisis económica.
"A esi propósitu respuende'l Programa Estratéxicu d'Internacionalización, alcordáu cola Federación Asturiana d'Empresarios y les cámares de comerciu", apuntó. Asina, según Fernández, les actuaciones nos países de la Lliga Árabe tán diseñaos en cuatro exes de trabayu, como son les acciones comerciales rellacionaes coles empreses del metal y de la construcción, el sofitu individualizáu a les empreses, les formaciones de consorcios ente les empreses pa fomentar la esportación y la especialización del equipu humanu.
Pal delegáu del Gobiernu n'Asturies, Gabino de Lorenzo, esti tamién ye un alcuentru decisivu" pa les relaciones comerciales. Na so intervención destacó la importancia de la seguridá ciudadana y l'orde públicu nos territorios onde se realicen les internacionalizaciones. "Asturies rexistra cuasi los meyores resultaos de seguridá ciudadana a nivel européu", apuntó.
LES ESPORTACIONES MULTIPLICÁRONSE POR CUATRO
Per otru llau, el vicepresidente de la Federación Asturiana d'Empresarios (FADE), Fernando Alonso, destacó que les esportaciones d'empreses asturianes escontra los países de la Lliga multiplicáronse por cuatro nos últimos diez años.
Pero esto, apuntó, ye daqué "recíproco", yá que les cifres d'importación por parte d'empreses árabes n'Asturies aumentaron un 50 per cientu nos últimos diez años. Asina, concluyó que les resultancies de les relaciones ente dambos territorios son "abondo notables" y estimó a los embaxadores de la Lliga Árabe la so "hospitalidá y tratu" escontra les empreses asturianes.
