ROMA, 24 de Mayu (EUROPA PRESS)
El Papa reunióse na Biblioteca privada del Palaciu Apostólicu del Vaticanu sobre a media hora col presidente d'Estaos Uníos Donald Trump. Amás, mientres el tradicional intercambiu de regalos, el Pontífiz pidió al mandatariu estaounidense que seya un "instrumentu de paz" y ésti, al despidise, aseguró que nun va olvidar les sos palabres.
El primer alcuentru del presidente d'Estaos Uníos y el primer Pontífiz d'orixe llatinoamericanu tuvo llugar a les 08.30 hores, xusto antes de l'audiencia xeneral de los miércoles.
Mientres la xunta, les conversaciones tamién dexaron un intercambiu de puntos de vista sobre dellos temes rellacionaos cola actualidá internacional y cola promoción de la paz nel mundu al traviés de la negociación política y el diálogu interrelixoso, con especial referencia a la situación n'Oriente Mediu y a la tutela de les comunidaes cristianes.
Asina lo punxo de manifiestu'l Vaticanu nun cortu comunicáu en qu'asegura que, mientres les "cordiales" conversaciones, 2espresóse'l preste" poles bones relaciones billaterales existentes ente la Santa Sede y los Estaos Uníos d'América, asina como pol compromisu común en favor de la vida y de la llibertá relixosa y "de conciencia". "Manifestóse'l deséu d'una collaboración tranquila ente l'Estáu y la Ilesia Católica nos Estaos Uníos, comprometida nel serviciu a la población nos campos de la salú, la educación y l'asistencia a los inmigrantes", destacó la Santa Sede. Nun ta previsto qu'haya una conferencia de prensa per parte del presidente d'EEUU en Roma.
Yá nel tradicional intercambiu d'obsequios, el Papa regaló a Donald Trump el mensaxe pontificiu pa la Xornada Mundial de la Paz que se celebra'l 1 de xineru y qu'esti añu lleva por títulu: 'La non violencia, estilu d'una política pa la paz'. Mientres lo apurrió'l Papa indicó col deu índiz dalgunos de los pasaxes del llibretu.
"Esto regálo-y pa qu'usté seya un instrumentu de paz", señaló de siguío Francisco al regala-y el Medallón de la Paz, que lleva un árbol d'olivu. Ye vezu que'l pontífiz agasaye a los xefes d'Estáu y de Gobiernu con esti símbolu de la paz.
Énte l'obsequiu y les palabres, Trump respondió-y: "Precisamos paz". Amás, Francisco regaló-y los trés documentos papales que definen el so pontificáu: La exhortación apostólica 'Evangelii gaudium' (Alegría del Evanxeliu), la encíclica 'Laudato si' (Allabáu seyas) y la exhortación apostólica post-sinodal 'Amoris laetitia' (L'Allegría del Amor).
Pela so parte, Trump apurrió al Papa una imponente caxa azul y díxo-y que conteníen tolos llibros escritos por Martin Luther King. "Piensu que-y van prestar, espérolo", especificó.
