UVIÉU, 5 Dic. (EUROPA PRESS) -
El Paraninfu del Edificiu Históricu de la Universidá d'Uviéu va acoyer el xueves 14 d'avientu próximu la entrega de los Premios Lliterarios del Gobiernu d'Asturies. Van ser cinco categoríes; Premiu 'Xosefa Xovellanos' de Novela, Premiu 'Xuan María Acebal' de Poesía, Premiu 'Máximo Fuertes Acevedo' d'Ensayu, Premiu 'María Josefa Canellada' de Lliteratura Infantil/Xuvenil y Premiu 'Alfonso Iglesias' de Cómic, amás del Premiu de Teatru Nel Amaro, que s'entrega pela primer vez.
Berta Piñán ye la ganadora de la 38 edición del Premiu Xosefa Xovellanos de novela n'asturianu, gallardón que concede la Conseyería d'Educación y Cultura y que ta dotáu con 3.000 euros. Foi gracies a 'Como la muda al sol d'una llagartesa', onde a partir d'un fechu criminal, l'autora percuerre distintos aspectos de la sociedá asturiana d'anguaño, sobre too del mundu rural.
La ventésima tercera edición del Premiu Xuan María Acebal de Poesía recayó nel escritor Pablo X. Suárez (nome artísticu de Pablo Suárez Fernández). Ente les obres presentaes, concédese por unanimidá conceder al poemariu tituláu 'Little Babilonia', destacando "el nivel llingüísticu y estilísticu, y la brillantez de les imáxenes d'un testu que xuega y entemez la tradición más clásica coles referencies más pop".
Xuan Santori Vázquez con '42.553: depués de Buchenwald' ye'l ganador de la XXIII edición del Premiu Máximo Fuertes Acevedo d'Ensayu. Ente les obres presentaes, el xuráu decidió por*unanimidá concede-y el Premiu al reconocer "el xuegu de ficción y realidá consiguío al traviés de la xuntura d'imaxe, testimoniu y documentación y la dimensión internacional qu'adquier la obra", según destaca l'acta.
'Vida nel campu', tamién de la escritora Berta Piñán -que fai historia nes lletres asturianes al llevar dos premios nuna mesma edición-, ye'l X Premiu María Josefa Canellada de Lliteratura Infantil y Xuvenil. Los miembros del xuráu reconocieron nesti testu "una obra notable qu'escuende denuncia pero que nun s'enllena de proclames innecesaries" y onde'l llector "participa de los mesmos descubrimientos que los personaxes y dexa'l xuiciu éticu pal remate de la llectura".
La séptima edición del premiu Alfonso Iglesias de cómic foi pal mierense Alberto Vázquez García cola so obra 'Los llazos coloraos', centrada na posguerra. L'acta del fallu destaca la "estraordinaria ellaboración del guión y el trabayu completu d'investigación que construyen un retratu fiel de la posguerra n'Asturies".
P'acabar, Carlos Alba ye'l ganador de la primer edición del Premiu Nel Amaro de Teatru del Gobiernu d'Asturies. Ente les obres presentaes, el xuráu decidió conceder el premiu al espectáculu 'Llázaro de Tormes', de Carlos Álba, al reconocer nél una "adaptación rellumante d'un clásicu a la cultura asturiana, con un gran procuru llingüísticu tanto nel testu como na representación del espectáculu, entroncando con un xéneru tradicional asturianu como ye'l monólogu, dignificándolu", según destaca l'acta.
La entrega va ser a les 19.30 hores y l'actu va contar cola actuación musical de Silvia Quesada y Alfredo González.
