PALMA DE MALLORCA, 24 de Xunetu (EUROPA PRESS)
El Parlament balear aprobó esti llunes en plenu estraordinariu la Llei de regulación de les corríes de toros y protección de los animales de Baleares, que prohíbe la muerte del animal mientres l'espectáculu ya impón restricciones al 'Correbou' (enzarru) de Fornalutx.
La denominada Llei de 'Toros a la balear', sin sangre nin muerte, naz con un avisu d'inconstitucionalidá y contó colos votos a favor de los grupos parlamentarios PSIB, Podemos y MÉS, los votos en contra de PP y Ciudadanos y l'apoyu parcial a delles de les enmiendes per parte del La PI.
Trátase d'una norma qu'establez delles restricciones nes corríes de toros, como la prohibición de mancar a los animales de nenguna manera, y poro, del usu de banderines; de la venta d'alcohol o de la entrada de menores de 18 años, amás de llendar el tiempu a 10 minutos por toru con un máximu de media hora en total.
Coles mesmes, establécense más controles sanitarios y de dopaxe pa profesionales y animales y estos últimos nun van poder tar nos chiqueros -compartimientos a escures onde se-yos zarra antes de la corrida- y van tener que tar 48 hores na corte, dende onde van tener que dir, directamente, a la plaza.
N'otru sen, les fiestes con caballos de Menorca nun van vese afectaes por esta llei qu'inclúi la diferencia ente animales "domaos y selvaxes". Poro, eventos como concursos o exhibiciones sí podrán siguise realizando.
