XIXÓN, 21 de Payares (EUROPA PRESS)
La maxistrada del Xulgáu de lo Penal númberu 2 de Xixón, Rosario Fernández Hevia, condenó a nueve año de prisión y al pagu de multes por valor de más de 16 millones d'euros a caún de los cinco acusaos pol fraude de sovenciones en Mina La Camocha. Amás, impúnxo-yos a los imputaos, xulgaos el pasáu xineru por trés delitos contra la Facienda Pública, el pagu conxuntu d'una indemnización al Estáu qu'algama los 16.164.263 euros.
Asina lo dio a conocer esti vienres mientres la llectura pública del fallu xudicial, na que nun tuvieron presentes nengún de los acusaos. Los lletraos, al rematar la sesión, mostraron la so intención de recurrir la sentencia, si asina-yos autoricen los sos clientes.
El recursu va ser d'apelación ante la Sala Octava de l'Audiencia Provincial d'Asturies con sede en Xixón, nel plazu de diez díes dende la notificación a los acusaos. El fallu que dicte l'Audiencia va ser yá firme.
Los acusaos por estos fechos son: Ángel García Brugos (alministrador únicu d'Hullas Coto Quirós), defendíu por Luis Tuero; Víctor Manuel Zapico (apoderáu de Mina La Camocha y ex conseyeru d'Industria del Principáu pol PSOE), defendíu por Ricardo Álvarez-Buylla; Manuel Martín Martín (presidente, conseyeru y apoderáu de Mina La Camocha), asistíu por José Carlos Botas; Guillermo Alfredo Honrubia Álvarez (apoderáu tanto d'Hullas Coto Quirós como de trabayos y Esplotaciones) y Margarita García Fernández (responsable de contabilidá y apoderada de Mina La Camocha), defendida por Ana Boto.
Concretamente, esta última lletrada mostróse "bien decepcionada" cola sentencia, y en declaraciones a los periodistes calcó en que se traten de fechos del 2011. Sicasí, apuntó que va haber qu'esperar a lleer la sentencia.
Tamién a la fecha refirióse l'abogáu José Carlos Botas, que calcó en que, pa los abogaos d'esti casu, los sos clientes nun cometieron ilícitu penal algún y, en tou casu, los delitos de los que se-yos acusen taríen prescritos. Señaló que'l fallu xudicial coincide col pidimientu fiscal, anque calcó n'esperar a ver cómo ta argumentada la sentencia.
Ésta tamién establez la inhabilitación especial pal exerciciu del derechu de sufraxu pasivu mientres el tiempu de la condena y la perda de la posibilidá de llograr sovenciones o ayudes públiques, del derechu a gozar de beneficios o incentivos fiscales o de la Seguridá Social mientres un periodu de 15 años (cinco años por caúnu de los delitos), asina como l'abonu de les costes procesales derivaes de la causa. En casu d'impagu de les multes, añadióse a la pena por caúna non abonada 270 díes de cárcel.
La indemnización conxunta, coles mesmes, vien desquitar l'importe de les ayudes al funcionamientu y a la reducción d'actividá indebidamente percibíes pola entidá Mines La Camocha S. A. nos exercicios de 1998, 1999 y 2000.
