UVIÉU, 16 Nov. (EUROPA PRESS) -
Los grupos de PSOE, Somos Avilés, IX y Ganemos nel Conceyu d'Avilés aprobaron esti xueves nel Plenu una proposición d'apoyu a la oficialidá del asturianu y qu'encamienta al Principáu a principiar la reforma del Estatutu d'Autonomía pa que esto sía posible, colos votos en contra de PP y Ciudadanos.
La iniciativa surdió d'una moción de Somos, IX y Ganemos pa instar al Gobiernu asturianu a iniciar los trámites pa declarar la oficialidá de la llingua asturiana. Los conceyales del PP y Ciudadanos foron los únicos que refugaron la propuesta.
Avilés súmase asina a Mieres, qu'aprobó una iniciativa asemeyada en xineru d'anguaño cola abstención del PSOE, y Xixón, onde'l PSOE dio finalmente l'apoyu a la iniciativa conxunta de XsP y IX depués d'aceptar estos últimos retirar el marcu temporal afitáu p'aprobar la oficialidá nesta llexislatura.
Nesta ocasión, la proposición aprobada n'Avilés tampoco nun fala de marcos temporales, pero recueye que s'encamentara al Principáu a recoyer la oficialidá "na reforma del Estatutu próxima", ensin esplicitar en que llexislatura va ser.
