UVIÉU, 21 de Febreru (EUROPA PRESS)
La diputada de Podemos na Xunta Xeneral Lucía Montejo acusó esti martes a la Conseyería de Cultura, y a la so Dirección de Política Llingüística, de "prevaricación", por axudicar un estudiu sobre la toponimia de los conceyos de Cuañu, Villayón ya Eilao, a una empresa d'inxeniería, daqué que contradiz, según la parlamentaria, la Llei de Contratos.
Nuna nota de prensa, Montejo esplicó "que'l Sector Públicu prohíbe axudicar contratos a persones xurídiques cuando la prestación contratada nun tea dientro del oxetu y fines de la so actividá, acordies colos sos estatutos, que ye exactamente lo qu'asocedió".
De forma paralela, siguió, "había dos equipos más d'especialistes trabayando en llabores de toponimia, y los trés casos viéronse implicaos nuna serie d'irregularidaes tocantes a plazos y formes de contratación".
Tal ye asina, que, según Podemos, "al interesáu ofreciéron-y el posterior concursu públicu cola promesa de que lo diba a ganar". "Esto ye yá de por sí un absolutu escándalu, porque de confirmase los fechos taríen falando d'un nuevu casu de prevaricación na Conseyería d'Educación y Cultura", denunció Montejo.
Asegura que "el mesmu interesáu interpunxo un recursu contra esta axudicación, pidiendo la suspensión cautelar de l'axudicación al alegar que dicha empresa nun cuenta nel so oxetu con esti tipu d'actividaes". Ye más, "la mesma empresa reconoció que la única esperiencia que teníen de daqué paecío a toponimia foi un recuentu de contenedores de basura en Cangas", criticó la representante de Podemos Asturies. Nesi sen, preguntó al conseyeru d'Educación: "Dígame usté, que tamién ye Filólogu, qué relación existe ente cuntar contenedores y facer estudios toponímicos".
Montejo, que califica estos fechos como "bien graves, yá que podría tratase d'un casu de práctiques illegales pa favorecer a empreses amigues", denunció que "por si fuera poco, caltuvieron una xunta colos máximos responsables de la Dirección Xeneral de Política Llingüística y la solución que-yos dieron foi ofrece-yos 'trabayos compensatorios' cola Conseyería en cuenta de que nun denunciaren les irregularidaes, avisándo-yos de que si siguíen alantre nun volveríen trabayar".
