UVIÉU, 27 de Mayu (EUROPA PRESS)
Podemos Asturies aseguró que les candidatures d'unidá popular son autónomes na toma de les sos decisiones y qu'esa toma de decisiones van basase no que decida la xente en cada ciudá, villa o pueblu.
"Los posibles pactos o negociaciones que se nos ofrecen yá nun van ser a puerta zarrada, como yera costume hasta agora. Llegamos p'abrir les puertes y ventanes de la política asturiana, porque'l diálogu ha ser cola sociedá, non ente partíos políticos", señalen nun comunicáu.
Podemos llogró ser la tercer fuerza política n'Asturies con nueve diputaos per detrás de PSOE 14 y PP 11. La nueva formación valoró los resultaos llograos nes elecciones autonómiques del pasáu domingu, nos que collechó más de 100.000 votos, lo que supón doblar el númberu de sufraxos llograos nes elecciones al Parlamentu Européu de fai malpenes un añu, con una subida de siete puntos porcentuales. Ye la segunda comunidá autónoma con meyores resultaos pa Podemos, namás superada lixeramente por Aragón.
Dende los comicios autonómicos de 1987, namás tres formaciones polítiques (PP, PSOE y Foru) antes que Podemos algamaron la cifra de nueve escaños na Xunta Xeneral del Principáu. El PSOE llogró'l pasáu domingu'l menor númberu de diputaos de la so historia, el PP superó nun escañu los sos peores resultaos y la suma del PP y del PSOE foi la más baxa de la historia del parlamentarismu asturianu (iguala la de les elecciones del 2011, que ganó Foru Asturies).
Amás d'en Asturies, Podemos tornó na tercer fuerza nos parlamentos autonómicos d'Aragón, Andalucía, Baleares, Castiella-La Mancha, Castiella y Lleón, Estremadura, Madrid, Murcia y La Rioxa. Ye cuarta fuerza en Cantabria, Comunidá Valenciana y Canaries, y quinta en Navarra.
Na circunscripción central, antes del recuentu del votu emigrante, Podemos quedó a solo 700 votos del PP pa ser la segunda fuerza. Amás llogra representación nes trés circunscripciones.
"Ante'l nuevu escenariu electoral queremos manifestar que la nuesa prioridá nun ye que'l Parlamentu asturianu xire a la derecha o a la izquierda, sinón que s'incline del llau de la xente. Sabemos que tenemos una gran responsabilidá nel cambiu que les urnes anunciaron esti 24 de marzu y ante esi cambiu queremos dexar claro que la nuesa prioridá siguen siendo los problemes que-y interesen a la xente, en temes como la creación d'empléu, el rescate ciudadanu o la llucha contra la corrupción", señalen.
"Nun vamos reforzar a una mano izquierda o a una mano derecha si ésta nun ta fuera del caxón. Defendemos, pa esti escenariu postelectoral sin mayoríes absolutes, una fueya de ruta construyida sobre'l sen común qu'empiece promoviendo les propuestes que más consensu social xeneren, porque tenemos claro que los intereses de la ciudadanía tán primero que los de cualquier partíu, incluyíu'l nuesu", acabaron.
