UVIÉU, 2 de Xunu (EUROPA PRESS)
Podemos va condicionar un hipotéticu votu a favor del nomamientu de Javier Fernández (PSOE) nel plenu d'elección del presidente d'esti vienres a que'l Partíu Socialista se comprometa a nun aplicar les polítiques de Mariano Rajoy n'Asturies, ente elles la nueva llei d'educación Lomce.
Asina lo esplicó a los medios el voceru de Podemos na Xunta Xeneral, Emilio León, mientres un actu contra les deportaciones d'inmigrantes, celebráu n'Uviéu.
Preguntáu pol sen del votu de Podemos na sesión del vienres (va tener qu'escoyer ente apoyar al candidatu socialista o l'astención, puesto que descarta l'apoyu a la candidata del PP, Mercedes Fernández), León esplicó que "agora toca dici-y a Javier Fernández si ta dipuestu a volver aplicar polítiques y Mariano Rajoy n'Asturies, por exemplu, como la Lomce". "De la respuesta de Javier Fernández va depender el votu de Podemos", añadió.
Señaló, en respuesta a preguntes sobre un supuestu averamientu col PSOE, que la so formación va defender "con firmeza les diferencies que tien cola FSA, anque tamién tamos abiertos a promover polítiques que favorezan los intereses de la ciudadanía en casu de gobernar y en casu de tener qu'exercer la oposición".
El voceru de Podemos recordó que la so formación dexó clara la so intención de "tratar de torgar que n'Asturies gobernaren les polítiques de Mariano Rajoy". "Díbamos facelo torgando que Mercedes Fernández pasara a la segunda vuelta, pero IU punxo una alfombra colorada y torgó que fuera Podemos el que pasara a la segunda vuelta", señaló, recordando l'astención de la organización d'izquierdes, a la que la formación de León pidiera'l so apoyu.
En referencia al primer plenu d'elección de presidente, celebráu esti miércoles, señaló que "dalgunos interpretaron el mesmu papel qu'interpretaron nos últimos cuatro años, pero nel que tamién vimos cambios importantes". "La segunda sesión foi muncho más moderada, nun tonu distintu, muncho más constructivu, y vamos ayudar a que dean lo meyor de sí mesmos pa qu'esta cámara seya un arguyu pa la ciudadanía, y pa que se fale de coses que-y importen realmente a la xente", acabó'l líder de Podemos n'Asturies.
