UVIÉU, 17 Nov. (EUROPA PRESS) -
Los votos de los grupos parllamentarios de Podemos, IX y Foru na Xunta Xeneral del Principáu d'Asturies (17 en total) sirvieron esti vienres pa refugar la propuesta de resolución del PP nel Debate d'Orientación Política que pidía al Principáu oponese a la oficialidá del asturianu. Mentanto, el PSOE decidió abstenese na votación.
El PP namás atopó l'apoyu de Ciudadanos, pero los 14 sufraxos que sumaron nun foron abondo. El diputáu 'popular' Luis Venta Cueli dixo que nun existe actualmente n'Asturies demanda pa que'l "bable" sía cooficial y añadió qu'esa midida supondría un "gastu inmensu". Dirixóse a les files socialistes y díxo-yos que se diben a "retratar" col so votu.
La del PP en contra de la cooficialidá foi la única propuesta de resolución que se debatió sobre l'asturianu nel Debate d'esti vienres. La diputada del PSOE Nuria Devesa encamentó a Venta a "camudar el chip" y falar de 'asturianu' y non de 'bable'. "nun vamos entrar nel xuegu perversu al que quier conducinos el PP", señaló.
Dende IX, sicasí, el so diputáu Ovidio Zapico pidiera primeramente "altor de mires" a los socialistes sobre un asuntu, el de la oficialidá, que, al so xuiciu, "nun tien vuelta atrás".
Por Foru tomó la palabra Pedro Leal, que dixo qu'el so partíu siempre consideró a la llingua asturiana parte del patrimoniu del Principáu. Mostróse partidariu d'impulsar un alcuerdu social que pase porque naide tea obligáu a usalo, aprendelo o impidilo. "Utilizalo como arma política pareznos reprochable", concluyó.
