UVIÉU, 20 Nov. (EUROPA PRESS) -
El portavoz de Podemos na Xunta Xeneral del Principáu, Emilio León, presentó una enmienda pa limitar l'asignación de diputaos y grupos y reordenar los recursos de la Cámara, con un amenorgamientu valoráu d'un 10%. Una propuesta que refugaron el restu de formaciones na Xunta de portavoces, al considerala "demagóxica" y "pocu realista".
Coincidieron en resaltar el llabor que se desenvuelve nel parllamentu y la importancia de nun resta-y valor a l'actividá llexislativa y a les xeres de control al Gobiernu qu'exerce la Cámara. Amás, tanto'l diputáu de Ciudadanos, Nicanor García, como la portavoz del PP, Mercedes Fernández, remarcaron que los diputaos de los sos grupos renunciaron a les dietes de quilometraxe.
El PP propunxo, coles mesmes, que se busque una fórmula que permita a los diputaos de Podemos "renunciar" a una parte del so sueldu y de l'asignación al grupu parllamentariu y evita-yos, asina, "un perxuiciu moral".
Sobre esto, Emilio León ironizó sobro l'alternativa que propón el PP a la so propuesta de "reforciar la función de control con menos dineru y meyor uso de los recursos", destacando que la formación de Mercedes Fernández y Mariano Rajoy caracterizase por ser "un partíu austeru que siempre refugó sobresueldos y cobrar comisiones".
0 A 3, LLINIA COLORADA DE LA NEGOCIACIÓN PRESUPUESTARIA
Depués de la Xunta de Portavoces, los diputaos esplicaron los asuntos del orde del día pal plenu d'esta selmana según el cronograma y les principales estorbises pa sacar alantre los presupuestos del Principáu pa 2018, ente los que s'atopa la incorporación de les escueles de 0 a 3 años na rede pública.
Pa Podemos el costu de la integración como un serviciu públicu y de baldre ye "más que asumible", anque son "sabedores de les reticencies" qu'hai entre los socialistes. Señalen qu'hai otros aspectos a negociar como les clauses sociales p'amenorgar la fienda salarial y favorecer la igualdá entre muyeres y homes, anque apunten a les escueles infantiles como clave na negociación.
Sobre esto, el portavoz socialista, Marcelino Marcos Líndez argumenta que'l modelu qu'articule la rede de 0 a 3 años tien que dir "más allá d'una propuesta de resolución", tener amparu xurídicu y ser beneficiosu pa los usuarios. D'esta manera, apuesta porque sía un serviciu públicu y concrétese con un alcuerdu "lo más amplio posible" y con "sensatez abondo" pa que se consolide "al marxe d'avatares políticos".
El calendariu de tramitación presupuestaria, que va empezar el martes 28 de payares col rexistru del proyectu na Cámara pol Gobiernu, aceptáronlo toles formaciones, anque la portavoz de Foru, Cristina Coto, foi crítica col Executivu de Javier Fernández por ser "una rémora" que fuercia "una tramitación azotada" de les cuentes.
Como novedá, va haber un plenu ordinariu posterior al rexistru del proyectu presupuestariu. Va ser el xueves 30 y el vienres 1 d'avientu a propuesta de Foru y PP. Tres les comparecencies, los plenos del debate presupuestariu van celebrase'l 22 y el 29 d'avientu.
Dende'l PSOE repiten la so "voluntá" pa negociar el presupuestu y confíen n'avanzar les negociaciones na selmana que resta hasta la so entrada na Cámara y, mesmo, como mentes el procesu de tramitación. "Si hai voluntá de toles partes pue negociase", aseguró Marcos Líndez.
Per otru llau, Mercedes Fernández incidió en que nun-y consta que'l Gobiernu socialista llograra un "apoyu" de Podemos y IX al proyectu anque afixera los plazos pa rexistralo na Xunta Xeneral. "Hai demasiaes incertidumes", dixo.
