UVIÉU, 19 Abr. (EUROPA PRESS) -
Podemos Asturies anunció la so participación na manifestación pola oficialidá d'esti sábadu 21 d'abril qu'entama la Xunta pola Defensa de la Llingua Asturiana. Nesi sentíu, faen un llamáu a tola xente pa llograr qu'esta movilización sía "histórica y determinante".
Al traviés d'una nota de prensa unviada n'asturianu y gallego-asturiano, el Conseyu Ciudadanu de Podemos afirma qu'Asturies lleva décades esperando esi reconocimientu "qu'igüe la discriminación y l'anomalía que supón que síamos ún de los últimos territorios del Estáu onde la llingua propia nun tien
estatus de llingua oficial".
"Negar los derechos civiles ye impropio d'una sociedá democrática y, nesi sentíu, dende Podemos Asturies defendimos, defendemos y vamos siguir defendiendo la llibertá qu'asiste a toa persona d'esta tierra pa usar la llingua que-y pete en tolos ámbitos públicos y privaos de la so vida", indiquen.
Pa Podemos, n'Asturies hai una parte "mui importante" de la ciudadanía que nun puede exercer esi derechu y, nesti momentu, "tamos xugándonos el modelu de sociedá que necesitamos y pola que naguamos p'afrontar los tiempos nuevos". Un modelu que pa la formación morada parte de la pluralidá y del respetu, tamién nel campu llingüísticu.
Asina, espliquen que la oficialidá ye una "cuestión de xusticia" y un "reconocimientu de la historia y de la cultura d'Asturies", polo que Podemos tar presente, "de manera activa y participativa", na manifestación, que va salir a les 12.00 de la Estación del Norte.
