UVIÉU, 24 de Xunetu (EUROPA PRESS)
Podemos Asturies ya Izquierda Unida mostráronse esti martes "bien optimistes" tres la xunta celebrada ente ambos partíos a instancies d'IU, pa tratar de llegar a acuerdos que permitan sacar alantre iniciatives de "izquierdes" na Xunta y evitar que "los dos años que resten de llexislatura seyan dos años perdíos como los trescurríos hasta agora".
Trés exes van centrar los grupos de trabayu de dambes formaciones pa establecer l'axenda política: les midíes d'emerxencia social; les midíes rexeneración democrática y l'usu del asturianu. Sobre'l primer exe esperen poder llevar en setiembre al parlamentu una iniciativa consensuada que permita aprobar una llei d'emerxencia social. Pa ello IU enmendará la llei d'emerxencia ciudadana que yá presentó Podemos apurriendo les sos propuestes que permitan por exemplu desbloquiar el Salariu Social.
Asina lo treslladaron a los medios de comunicación al términu del alcuentru de trabayu'l coordinador d'IU, Ramón Argüelles y el secretariu xeneral de Podemos, Daniel Ripa. Argüelles aseguraba que van trabayar pa "cambiar l'axenda política y dexar sin conteníu'l discursu de Javier Fernández de que la izquierda nun s'entiende".
"Espero que podamos recuperar estos dos años que queden de llexislatura y convidamos al PSOE a facer daqué que tenía que facer yá, como apoyar esta iniciativa na Xunta", dixo Argüelles, que volvió repitir l'incumplimientu de los socialistes del pactu d'investidura soscritu con IU gracies al que gobierna Javier Fernández.
Nesti sen, el coordinador d'IU consideró "una carta a los Reis Magos la llamada al acuerdu de la izquierda de Javier Fernández y añadió que "IU yá nun lu cree porque nun cumplió nin unu de los acuerdos adoptaos". Por ello destacó que si ye verdá que'l Gobiernu quier xirar a la izquierda lo que "tien que facer ye apoyar les iniciatives d'izquierdes nel Parlamentu".
Nesta llinia, Daniel Ripa manifestó que "cuando se dexa de mirar al PSOE, daqué qu'asocedió con IU nestos dos años, y piénsase en llevar la iniciativa política y ser l'alternativa de cambiu n'Asturies creo que ye una meyora".
"Pasó la fase de dar encargos al Gobiernu y de mirar hacia él pa entrar na fase de tomar yá la iniciativa cola esperanza que teamos ante un cambiu de llargu algame y dexemos de ver a un Gaspar Llamazares que mira y xira hacia'l gobiernu socialista".
Dende Podemos incídese na importancia de sacar alantre iniciatives de rexeneración democrática y avanzar "en cuestiones básiques" como ye la llucha contra la corrupción.
