UVIÉU, 21 de Febreru (EUROPA PRESS)
El Xefe de Grupu d'inspecciones Oculares de la Policía Científica foi esti martes bien tayante al respective de la muerte y anterior maltratu del pequeñu de 20 meses. El so cadabre apaeció nel interior d'una maleta nes proximidaes del apeaderu de l'Argañosa d'Uviéu en payares del 2014. L'axente manifestó que "sin duda nenguna" el neñu "morrió por una brutal agresión y les lesiones presentaben un maltratu anterior bien grave con carecimientos enllargaos mientres tiempu".
La segunda xornada del xuiciu contra los dos acusaos por matar al neñu de 20 meses, la so madre Fadila C. y la so daquella pareya, David F., ta resultando realmente dura colos testimonios de los axentes que participaron nel casu.
Asina, l'inspector de la Policía Científica esplicó que "poques veces ven agresiones d'esi tipu". "En 20 años de serviciu nunca vi nada igual. Hubo un indudable maltratu previu brutal. Vi a compañeros saltáse-yos les llárimes", indicó l'inspector.
"Lo qu'observamos na inspección ocular posterior nel pisu -de los dos acusaos-- ye compatible cola brutal agresión, pero amás la escena ta manipulada pa que los qu'entraren nun lo notaren", indicó l'axente que detalló como toparon restos de sangre en munchos llugares de l'habitación del pequeñu y nel salón la vivienda qu'indicaben qu'hubo "golpes violentos contra'l pequeñu, al qu'amás debieron de solmenalu contra la paré".
Sobre esos "induldables maltratos previos", l'axente detalló, ente otres cuestiones, como'l cuerpu del pequeñu presentaba'l fémur quebráu con "el güesu separáu tres centímetros lo que tuvo que produci-y un dolor inmensu, lo mesmo qu'una quemadura fonda que debió de ser d'un dolor insoportable". "Llevaba careciendo esi sufrimientu munchos díes antes d'apaecer muertu nes víes del tren", insistió.
L'axente, que foi concretu en detalles, esplicó a la sala en presencia de los acusaos qu'escucharon fríamente'l relatu, que touo indica que "al bebé dáse-y muerte nel pisu pero mui posiblemente nun fuera una muerte instantánea". Tamién dixo que la intención de la persona que tiró la maleta col cadabre yera tapecela y que nun la alcontraren. Esplicó que'l cadabre del neñu taba "endolcáu nel interior de la colcha" y añadió que llamó l'atención de los axentes que'l cuerpu taba "envueltu, metíu como un embalaxe con dellos pliegues na concha".
