LONDRES, 28 de Xunu (EUROPA PRESS)
Polo menos 80 persones morrieron na quema rexistrada na Torre Grenfell de Londres, según l'últimu balance ofrecíu esti miércoles pola Policía, qu'alvirtió de que la cifra final podría nun conocese hasta finales d'esti añu.
Según esplicó la oficial al cargu de la investigación policial, Fiona McCormack, hai 80 persones muertes o desapaecíes a les que se da por finaes. La mayoría d'elles morrieron en 23 de los 129 apartamentos del bloque siniestráu.
"Lo que pueo dicir ye que creemos qu'unes 80 persones tán muertes o tristemente desapaecíes y tengo que barruntar que tán muertes", declaró la oficial a la prensa, apelando a esperar pa conocer "el verdaderu costu humanu d'esta traxedia", según informa la cadena BBC.
La Policía cree que dellos residentes intentaron subir hacia arriba nel edificiu pa escapar de les llames y dellos podríen acabar nun solu apartamentu.
Según McCormack, los axentes tán alcontrándose con una "total devastación dientro de los pisos" polo que yá se ta preparando a delles families pa la idea de que los restos de los sos seres queríos nun se recuperen nunca.
En total, la quema del 14 de xunu destruyó 151 viviendes, la mayoría na Torre Grenfell pero tamién dalgunes n'inmuebles cercanos.
Hasta'l momentu, polo menos una persona de 106 de los 129 apartamentos de la torre resultó contactada col fin d'identificar a posibles finaos. Dalgunes de les víctimes indentificáronse gracies a les 999 llamaes realizaes, 26 d'elles de los 23 apartamentos onde se cree que se produxeron el mayor númberu de víctimes. Estos 23 apartamentos alcuéntrense ente la planta 11 y la 23 del edificiu.
Según McCormack, cabe deducir que "nenguna de les persones nesos apartamentos sobrevivió, lo qu'inclúi a cualquier que "viviera nellos o tuviera de visita".
